काठमाडौं- नेकपा अध्यक्ष एवं प्रधानमन्त्री केपी शर्मा ओलीनिकट नेताहरुलाई अर्का अध्यक्ष पुष्पकमल दाहाल‘प्रचण्ड’ले एकता जोगाउँन आ–आफ्नो ठाउँबाट लाग्न आग्रह गरेका छन्। दिउसो साढे २ बजे अध्यक्ष प्रचण्डले प्रधानमन्त्री ओलीनिकट स्थायी कमिटी सदस्य प्रदीप ज्ञावली, सुवासचन्द्र नेम्वाङ र प्रदेश नम्बर ५ का मुख्यमन्त्री शंकर पोखरेललाई भेटेका थिए। पार्टी एकता गम्भीर संकटमा परेको बताउँदै प्रचण्डले एकता जोगाउन सबैले सकारात्मक भूमिका खेल्न आग्रह गरेका थिए।
‘हामीले अत्यन्तै मेहनतका साथ पार्टी एकता गर्यौं। अब पार्टी एकतालाई कसरी जोगाउने अहिलेको मुख्य चुनौती हो‚’ प्रचण्डको भनाइ उद्धृत गर्दै एक स्थायी कमिटी सदस्यले भने, ‘पार्टीमा तपाईंहरु सबैले आ-आफ्नो ठाउँबाट भूमिका खेल्नुस्। यो इतिहासको आवश्यकता हो।’
पार्टी एकता दुई अध्यक्षले गरेको बताउँदै स्थायी कमिटी सदस्यहरुले फुटलाई जोगाउने जिम्मेवारी पनि दुई अध्यक्षको काँधमा भएको बताएका थिए। ‘हामीलाई प्रचण्ड कमरेडले बोलाएर खुमलटार गएका थियौं। छलफलमा हामीले एकता दुई अध्यक्षले गर्नुभयो। फुटबाट जोगाउने जिम्मेवारी पनि दुई अध्यक्षकै काँधमा छ‚’ एक स्थायी कमिटी सदस्यले भने, ‘एकता भत्किएमा धेरैतिर भत्किदै जान्छ। विभाजन होइन एकतालाई नै मूल मन्त्र बनाएर दुई अध्यक्ष बसेर छलफल र संवादबाट समस्याको निकास निकाल्नुस् भनेर हामीले भन्यौं।’ बैठकमा सहभागी स्थायी कमिटी सदस्यहरुले एकता नै अहिलेको आवश्यकता भएको बताउँदै वार्ताबाटै निकास खोज्न आग्रह गरेका थिए।
ईश्वर पोखरेल र विष्णु पौडेलले भेटे प्रचण्ड
बिहीबार दिउँसो बालुवाटारबाट गएका तीन स्थायी कमिटी सदस्यहरुलाई भेटेपछि बेलुका प्रचण्डले रक्षामन्त्री ईश्वर पोखरेल र पार्टीका महासचिव विष्णु पौडेलसँग समेत भेट गरेका थिए। बिहीबार अध्यक्ष ओली-प्रचण्डबीच भेटघाट नभएपछि पोखरेल र पौडेल दुवै नेतालाई खुमलटार बोलाएर उनले छलफल गरेका थिए। पार्टीभित्रको गतिरोध अन्त्य गर्नका लागि प्रचण्डले बिहीबार ओलीनिकट नेताहरुलाई खुमलटार बोलाएर छलफल गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
