काठमाडौं–कोरोना संक्रमण न्यूनीकरणका लागि भन्दै सरकारले लकडाउन गरेको एक सय दिनभन्दा बढी भइसकेको छ। लकडाउनसँगै विकासमा काम पनि अवरुद्ध भइरहेका छन्। तर, पोखरामा निर्माण भइरहेको पोखरा क्षेत्रीय अन्तर्राष्ट्रिय विमानस्थलको काम भने जारी छ।
संस्कृति, पर्यटन तथा नागरिक उड्डयन मन्त्रालयले पोखरा क्षेत्रीय अन्तर्राष्ट्रिय विमानस्थलको काम तोकिएकै समयमा सम्पन्न हुने गरी भइरहेको जनाएको छ। सरकारले उक्त विमानस्थल सन् २०२१ को जुलाईसम्म निर्माण सम्पन्न गर्ने लक्ष्य लिएको छ। मन्त्रालयका अनुसार लकडाउनकै अवधिमा पोखरा क्षेत्रीय अन्तर्राष्ट्रिय विमानस्थलको भौतिक प्रगति ९ प्रतिशतले बढेको छ।
‘लकडाउन अगाडिसम्म पोखरा क्षेत्रीय अन्तर्राष्ट्रिय विमानस्थलको भौतिक प्रगति ५० प्रतिशत थियो,’ संस्कृति, पर्यटन तथा नागरिक उड्डयनमन्त्री योगेशकुमार भट्टराईले भने, ‘अहिले भौतिक प्रगति बढेर ५९ प्रतिशत पुगेको छ। पुरै सन्तुष्ट हुने अवस्था नभए पनि कामको प्रगति सन्तोषजनक नै छ।’
पोखरा क्षेत्रीय अन्तर्राष्ट्रिय विमानस्थलको रन–वे निर्माणलगायत १४ वटा भवन निर्माणको काम सकिएको छ। भवनमा फिनिसिङ तथा उपकरण जडानको काम सुरु भएको छ। निर्माण कम्पनीले विमानस्थलको पहुँच मार्ग, कार पार्किङ, टर्मिनल भवन आसपासको सडक निर्माणको काम पनि अन्तिम चरणमा पुर्याएको छ। अहिले विमानस्थलमा २ सय ४४ चिनियाँ नागरिक र ९० नेपालीले काम गरिरहेको मन्त्रालयले जनाएको छ। विमानस्थल निर्माणमा १ सय १० वटा हेभी उपकरण प्रयोग भइरहेका छन्।
यस्तै, निर्माणको अन्तिम चरणमा पुगेको गौतमबुद्ध अन्तर्राष्ट्रिय विमानस्थलको भौतिक प्रगति पनि लकडाउनकै अवधिमा ३ प्रतिशतले बढेको छ। अहिले विमानस्थलको भौतिक प्रगति ९१ प्रतिशत पुगेको छ। विमानस्थलमा धावनमार्ग पार्किङ्ग क्षेत्र जोड्ने लिंक ट्याक्सी वे निर्माणको काम पनि लकडाउनै बीचमा सकिएको मन्त्रालयको भनाइ छ। यसैगरी, रन वे लाइट जडानको कार्य अन्तिम चरणमा पुगेको छ।
साथै टर्मिनल भवनमा एयर कन्डिसन तथा अन्य उपकरण जडानको काम निरन्तर भइरहेको र फिनिसिङको काम पनि अन्तिम चरणमा पुगेको छ।
विमानस्थल निर्माण कार्यमा २९ चिनियाँसहित २७५ कामदार निरन्तर परिचालित रहेको मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1786602170.png)
