काठमाडौं-दर्जनौं ठगीमा संलग्न विजय पाण्डे पक्राउ परेका छन्। फर्निचर पसलदेखि विश्व स्वास्थ्य संगठन (डब्लुएचओ) सम्मको जागिरको अफर देखाएर ठगी गर्ने पाण्डेलाई महानगरीय प्रहरी अपराध महाशाखाको टोलीले पक्राउ गरेको हो।
नवलपरासीपूर्वको सुस्तादेउचुली नगरपालिका १५ का ३४ वर्षीय पाण्डेलाई महाशाखाको विशेष टोलीले मंगलबार काठमाडौं नयाँ बानेश्वरबाट पक्राउ गरेको महाशाखाका एसएसपी दीपक थापाले बताए।
पाण्डेले दर्जनौँ व्यक्तिलाई ठगी गरेको पाइएको छ। चितवनको भरतपुर महानगरपालिका बस्ने रमा पराजुली (नाम परिवर्तन)सँग पाण्डेको करिब १ वर्षअघिदेखि चिनजान थियो। त्यतिबेला पाण्डेले आफू डब्लुएचओको कर्मचारी भएको परिचय दिएका थिए। उनले रमालाई डब्लुएचओमा कर्मचारी माग भएकोले त्यहाँ जागिर लगाइदिन्छु भन्दै फोन गरेका थिए। डब्लुएचओको ललितपुर कार्यालयमा जागिर खुलेको भन्दै नक्कली 'अफर लेटर'समेत पठाएर रिलायबल नेपाल इन्स्योरेन्स कम्पनीको कागजातसमेत देखाई विश्वासमा पारेका थिए।
त्यसपछि गत वैशाख १९ गतेदेखि असार ७ गतेसम्म पटक–पटक पाण्डेले आफ्नो बैंकको खातामा १ लाख ८२ हजार रुपैयाँ जम्मा गर्न लगाएको पाइएको एसएसपी थापाको भनाइ छ। आफ्नो खातामा पैसा जम्मा भएपछि पाण्डे सम्पर्कविहीन भएका थिए। उनै पीडित अधिकारीले दिएको जाहेरीका आधारमा पक्राउ परेका पाण्डेबाट ठगीका अनेक कर्तुत खुलेको छ।
उनले काठमाडौं शंखमुलमा धनबहादुर विष्टले सञ्चालन गरेको फर्निचरबाट १८ लाखको सामान किन्ने भन्दै सञ्चालकसँग ५० हजार रुपैयाँ लिएर ठगी गरेको पाइएको छ। उता चितवनकै निशानबाबु घिमिरेलाई समेत डब्लुएचओमा जागिर लगाइदिने भन्दै ३ लाख ५० हजार रुपैयाँ ठगी गरेका थिए। यस्तै, अछामको तुर्माखाँद घर भएकी रञ्जु बुढालाई पाण्डेले एक वर्षसम्म नक्कली अफिस खडा गरेर बिना पैसा काममा लगाएका थिए ।
त्यसैगरी नवलपरासीपूर्वका दीपक खनाल, धनबहादुर क्षेत्री, मनाङका कासी गुरुङ, सरिता भण्डारी, रमा घिमिरेलगायतलाई समेत डब्लुएचओमा जागिर लगाइदिने भन्दै पाण्डेले ठगी गरेको पाइएको छ।
पाण्डेलाई थप कारबाहीका लागि महानगरीय प्रहरी परिसर काठमाडौं पठाइएको महाशाखाले जनाएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
.JPG)
