काठमाडौं– सुदूरपश्चिम सरकारले प्रदेश सभामा प्रस्तुत गरेको बजेटमाथिको छलफलमा विपक्षी दलको नाराबाजीकै बीचमा संसदबाट पारित गरिएको छ। पारित गर्ने क्रममा विपक्षीले सुरुदेखि अन्त्यसम्म नाराबाजी गरिरहे। प्रतिपक्ष दलको नाराबाजीको बेवास्ता गर्दै सभामुख अर्जुनबहादुर थापाले सदनको कारबाहीलाई निरन्तरता दिए।
सभामुखले छैठौं अधिवेशनको २५ बैठक सुरु गर्नासाथ विपक्षी दलका सांसदहरुले उठेर विरोध सुरु गरेका थिए। सरकार भ्रष्टचारी भएको, कोरोनाको खर्च सार्वजनिक नगरेको, विधिको शासन नभएको, संसदलाई अपमान गरेको लगायतका नारासहित संसदमा नाराबाजी गरिरहे। विपक्षी दलका सांसदहरुले करिब नौ मिनेट संसद अवरुद्ध गरे। सभामुखले आगामी आर्थिक वर्षको आय र व्ययको अर्थसम्बन्धी कार्यान्वयन गर्न बनेको विधेयकमाथिको छलफल प्रारम्भ गरे।
विधेयकमाथि छलफलका लागि सभामुखले सत्तारुढ दलका सांसदलाई समय उपलब्ध गराए। सत्तारुढ दलका नेताले बजेटको प्रशंसामा समय खर्चे। प्रतिपक्षी दलले नाराबाजी रोकेनन्। नेकपाका दुई सांसदले बोलेपछि सभामुख थापाले विधेयकका दफाहरू पारितका लागि सदनमा विधेयक प्रस्तुत गरे। सदनमा निर्णयार्थ प्रस्तुत गर्दा विपक्षी दलले नाराको आवाज थप बढाए।
संसदमा प्रस्तुत बजेट छलफलमाथि विपक्षी दलहरुले विरोध जनाइरहँदा सभामुख थापाले विनियोजन विधेयक पारित गरेका हुन्। संसदमा विपक्षी दलका नेताहरुले निरन्तर नाराबाजी गरिरहँदा समेत सभामुखले ‘हुन्न भन्ने आवाज नसुनिएको’ भन्दै विधेयक पारित गरेका थिए। नाराबाजी चर्किरहँदा सभामुखले ‘हुन्न’ भन्ने आवाज नसुनिएको भन्दै प्रस्तावहरु पारित भएको सुनाइरहेका थिए।
प्रदेश सभामा प्रतिपक्षी दलहरू नेपाली कांग्रेस र जनता समाजवादी पार्टी (जसपा) ले कोरोना रोकथाम र नियन्त्रणमा सरकार पूर्ण उदासीन देखिएको आरोप लगाएका छन्। असार १० गतेदेखि सदनमा अवरोध जारी राखेपछि संसद बैठक बारम्बार स्थगित भइरहेको छ।
प्रदेश सरकारले असार १ मा सदनमा बजेट प्रस्तुत गरेको थियो। सुदूरपश्चिम सरकारले आगामी आर्थिक वर्षका लागि ३१ अर्ब ३७ करोडको बजेट सदनमा प्रस्तुत गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
