काठमाडौं- कोभिड १९ महामारी नियन्त्रण तथा रोकथामका लागि अवलम्बन गरिएको लकडाउन अवधिको विद्युत महशुल आगामी साउन पहिलो हप्ताभित्र तिर्दा जरिवाना नलाग्ने नेपाल विद्युत प्राधिकरणले जनाएको छ।
प्राधिकरणको असार १९ गतेको निर्णयअनुसार उपभोक्ताले गत चैतयताको विद्युत महशुल साउन ७ गतेसम्म तिर्दा जरिवाना तिर्नुपर्ने छैन। ‘विद्युत महशुल संकलन विनियमावली २०७३ मा उल्लेखित सम्पूर्ण ग्राहकहरुले गत २०७६ चैत, २०७७ वैशाख, जेठ र असार महिनाको विद्युत बिल आगामी साउन ७ गतेसम्म भुक्तानी गरेमा जरिवाना लाग्नेछैन।’ प्राधिकरणको निर्णयमा भनिएको छ।
गत वैशाख १४ गते बसेको मन्त्रिपरिषद बैठकले लकडाउन अवधिको विद्युत महशुलमा खपतका आधारमा छुट दिने निर्णय गरेको थियो।
मन्त्रिपरिषदको निर्णयअनुसार मासिक १० युनिटसम्म खपत गर्नेलाई निःशुल्क‚ १५० युनिटसम्मको विद्युत खपतमा २५ प्रतिशत र २५० युनिटसम्मको विद्युत खपतमा १५ प्रतिशत विद्युत छुट दिने निर्णय गरिएको थियो। त्यस्तै आगामी आर्थिक वर्ष २०७७/७८ को बजेट वक्तव्यमार्फत सरकारले लकडाउन अवधिभर उद्योगधन्दाहरुको डिमाण्ड शुल्क पनि छुट दिने भनेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।