काठमाडौं- स्थानीयको जायज माग पुरा गरेर मात्र मेलम्चीको पानी काठमाडौं लैजानुपर्ने सिन्धुपाल्चोक क्षेत्र नम्बर २ का सांसद शेर बहादुर तामाङले बताएका छन्। मेलम्ची खानेपानी विकास समिति र खानेपानी मन्त्रालयले एकतर्फी रुपमा सिन्धुपाल्चोकका जनप्रतिनिधि, स्थानीय तह र सरोकारवाला निकायहरुलाई कुनै जानकारी नदिई पानी पथान्तरण सुरुवात गरेको भन्दै प्रभावित क्षेत्रका स्थानीय जनप्रतिनिधि, सरोकार वालाहरुले असन्तुष्टि व्यक्त गरेका छन्।
मेलम्ची खानेपानी आयोजनाको मुख्य सुरुङमा असार २१ गते पानी परीक्षण सुरु गरेपछि मन्त्रालयलगायत खानेपानी आयोजनाले सिन्धुबासीलाई बेवास्ता गरेको भन्दै यस क्षेत्रका नागरिकलगायत जनप्रतिनिधि, सरोकारवाला पक्षले मन्त्रालयको कामप्रति विरोध जनाएका हुन्।
स्थानीयको मागलाई सम्बोधन गरी, वातावारणीय प्रभावको मुल्याङ्कन गरी सिन्धुपाल्चोकको विकास निर्माणको कार्यमा हातेमालो गर्दै अगाडि बढ्नुपर्नेमा त्यसो नभएकोमा खानेपानी मन्त्रालयले गरेको कामप्रति स्थानीय आक्रोशित बनेका हुन्।
यही विषयमा सिन्धुपाल्चोक क्षेत्र नम्बर २ का सांसद एवम् पूर्वमन्त्री शेर बहादुर तामाङले आफूलगायत प्रभावित क्षेत्रका जनप्रतिनिधि कसैलाई पनि यस विषयमा थाहा नदिनु दुखद् भएको बताए। सिन्धुपाल्चोकमा यति ठूलो कार्य हुँदा यसै क्षेत्रका जनप्रतिनिधि, कुनै पनि खानेपानीसँग सम्बन्धित पधादिकारीलाई सहभागी नगराई मन्त्रालयले जुन ढंगले पानी परीक्षण गर्यो त्यो दुखद् भएको भन्दै सिन्धुबासी पनि सहभागी भएर गर्व महशुस गर्नेबेलामा एकलौटी ढंगबाट काम अगाडि बढाइनुले राम्रो संकेत नदिएको उनको भनाइ छ।
प्रभावित क्षेत्रका स्थानीयको हकमा के हुन्छ? भन्ने प्रश्नमा सांसद तामाङले रोयल्टी निर्धारण गरेर विकास निर्माणको काममा सहयोग गर्नुपर्ने र मेलम्चीको पानी काठमाडौं लगेर काठमाडौंबासीको काकाकुल स्थितिलाई केही हल गर्नका लागि यति ठूलो आयोजना सम्पन्न हुनै लाग्दा मेलम्ची प्रभावित क्षेत्रका बस्तिहरुमा पनि सफा पिउने पानी उपलब्ध गराउनु राज्यको दायित्व रहेको स्मरण गराउँदै तामाङले अब जिल्लाबासीहरू फाइल बोकेर विभिन्न कार्यालयहरु धाउन भन्दा पनि सम्बन्धित निकाय आफैँ जनताको आवश्यकता बुझ्न लाग्नुपर्ने बताए।
उनले खानेपानी मन्त्रालयलगायतसम्बन्धी पक्षलाई बेलैमा ढंग पुर्याएर मात्र चल्न आग्रह गरेका छन्। तामाङले आगामी २६ गते प्रभावित क्षेत्रका सबै पक्षहरुसँग बसेर छलफल गर्ने र त्यही निर्णयअनुसार अगाडि बढ्ने समेत जानकारी गराए। पानी परीक्षण गर्दा सिन्धुबासीलाई छल्न खाजेको भन्दै उनले सिन्धुबासीलाई यस क्षेत्रको विकास निर्माणलगायत रोयल्टी निर्धारण गरेर मात्र पानी जाने हुनाले सजग र सचेत हुँदै ढुक्क हुन आग्रह गरेका हुन्।
सांसद तामाङले खानेपानी मन्त्रीले सामाजिक , राजनितिक र विभिन्न अवरोधका बावजुद पानी परीक्षण गरियो भनेको भनाइप्रति असन्तुष्टि जनाउदै उनले विभिन्न समस्याहरु देखाएर समाधान गर भन्न पनि नमिल्ने हो र? भन्दै प्रश्न गरेका छन्।
सिएमसीले दिनुपर्ने ज्याला नदिएको अति सामान्य व्यापारीहरुले सप्लाइ गरेको सामानको मूल्यको माग गर्दा त्यसलाई समाधान गर्दै पानि काठमाडौं लाने बाटो खोज्नुको साटो अवरोध भनेर टार्न खोज्नु दुःखद् रहेको भन्दै विविध समस्याहरू समाधान गरेर मात्र पानी लैजानुपर्ने उनको भनाइ छ। उनले चिन्तन फरक रहेको भन्दै दुवै तहका सम्बन्धित पक्षहरु बसेर छलफल गरेर अगाडि बढ्ने बताए।
सरकारले स्थानीयको माग सम्बोधन गरेर स्थानीय जनतालाई खुसी पार्ने हो भने मेलम्चीको मात्र नभई याङिलार्केको पानि समेत पठाउन आफूहरु तयार रहेको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
