काठमाडौं-चक्रपथ विस्तारअन्तर्गत महाराजगञ्जको जग्गा प्राप्तिका लागि सूचना प्रकाशित भएको छ। सडक विभागअन्तर्गतको विकास सहायता कार्यान्वयन महाशाखा चक्रपथ सुधार योजनाको सिफारिसमा जिल्ला प्रशासन कार्यालयले जग्गा प्राप्ति ऐन अनुसार सूचना निकालेको हो।
जग्गा प्राप्तिका लागि काठमाडौं महानगरपालिका ३ स्थित नारायण गोपाल चोकदेखि पूर्वतर्फ १ सय ३५ मिटर र पश्चिमतर्फ १ सय ९ मिटर क्षेत्रभित्र हाल सडक सिमाना चक्रपथको केन्द्रबाट १५/१६ मिटर रहेकोमा अब ३१/३१ मिटर काम गर्नुपर्ने छ। त्यसैका लागि आवश्यक पर्ने दुवै तिर १६/१६ मिटर जग्गा अधिग्रहण गर्ने निर्णय सरकारले गरेको थियो।
२०७६ पुस १४ को मन्त्रिपरिषद्को निर्णयअनुसार उक्त जग्गा अधिग्रहण गर्ने भनिएको थियो। सोही अनुसार मंगलबार सूचना प्रकाशित भएको छ। यो सूचनासँगै जग्गाधनीहरुले मुआब्जा दाबी गर्न ३५ दिनभित्र आ-आफ्नो हकदैया या भोगचलन निस्सा प्रमाणित गर्न जिल्ला प्रशासन कार्यालयमा निवेदन दिनुपर्ने छ।
४९ जग्गाधनीले मुआब्जाका लागि आवेदन दिन सक्ने छन्। सबैको जग्गाको कुल क्षेत्रफल ७ हजार ५ सय ७.५९ वर्ग मिटर छ। चक्रपथ विस्तारअन्तर्गत दोस्रो चरणमा कलंकीदेखि धोवीखोला खण्डको विस्तारको तयारी सरकारले गरेको छ।
चीन सरकारको सहयोगमा चक्रपथ ८ लेनको बनाइँदैछ। पहिलो चरणमा कोटेश्वर-कलंकी खण्डको निर्माण सकिएको छ। दोस्रो खण्ड कलंकी-धोवीखोला विस्तारका लागि साइट क्लियर गर्ने काम सकिइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787494229.jpg)
-1786602170.png)
-1786513116.png)
