काठमाडौं- नेकपाभित्र शीर्ष नेताहरुबीच विवाद चर्किँदै जादा मन्त्रीहरु कुन कित्तामा उभिने भन्दै चेपुवामा परेका छन्। पार्टीभित्रको विवादमा केपी ओलीले एक पक्षको नेतृत्व गरिरहेको र पुष्पकमल दाहाल प्रचण्ड तथा माधव नेपालले अर्को पक्षको नेतृत्व गरिरहेको अवस्था छ। जसका कारण मन्त्रीहरुलाई धर्मसंकट परेको हो।
गुटका भेलाहरुमा लुकीलुकी सहभागिता जनाउँदै आएका मन्त्रीलाई गत आइतबार प्रधानमन्त्रीले आफ्नो कित्ता कुन हो क्लियर गर्नुस् भनेपछि मन्त्रीहरुलाई थप अप्ठ्यारो निम्तिएको हो। प्रधानमन्त्रीको भनाईलाई पार्टी विवादमा आफू इतरको गुटलाई सहयोग गर्ने हो भने मन्त्री पद छाडेर जानुस् भनेर गरिएको आग्रहको रुपमा पनि कतिपयले अर्थ्याउँछन्।
मन्त्रिपरिषद् सदस्य भएका कारण केपी ओलीको निकटमा रहेका काम गर्नुपर्ने र उनीप्रति नै जवाफदेही हुनुपर्ने मन्त्रीहरुको बाध्यता छ। तर, पार्टीभित्रको लडाइँमा उनीहरु फरक गुटका जिम्मेवार सदस्य पनि मानिन्छन्। त्यसको रणनीति पनि तयार गर्छन्। जसका कारण मन्त्रिपरिषद्मा रहेका प्रचण्ड-नेपाल निकट सदस्यहरुलाई अहिले नैतिक संकट पनि उत्पन्न भएको छ।
पूर्व माओवादीबाट मन्त्री भएका गृहमन्त्री रामबहादुर थापा, शिक्षामन्त्री गिरिराजमणि पोखरेल, वनमन्त्री शक्ति बस्नेत, ऊर्जामन्त्री वर्षमान पुन, उद्योग मन्त्री लेखराज भट्ट, श्रम मन्त्री रामेश्वर राय यादव र खानेपानी मन्त्री बिना मगरमध्ये चार मन्त्री प्रधानमन्त्री र अर्का अध्यक्ष प्रचण्डको समदूरीमै थिए। गुटका भेलाहरु एकपछि अर्को गर्दै बाक्लिँदै गएपछि थापा, पुन, बस्नेतले आफ्ना कित्ता स्पष्ट गरी प्रचण्डतिर फर्किसकेका छन्।
गृहमन्त्री थापा प्रधानमन्त्री र प्रचण्डको सचेततापूर्वक समदूरीमा थिए। पार्टी विभाजनसम्मको अवस्थामा पुगेपछि थापा प्रधानमन्त्रीबाट कित्ता परिवर्तन गरी प्रचण्डतिरै फर्किएका थिए। तर, उद्योग मन्त्री भट्टले आफ्नो निकटता प्रधानमन्त्रीसँगै देखाएकाले प्रचण्डतिर नफर्किने विश्लेषण पूर्वमाओवादी समूहले गर्न थालेको छ। तर पार्टी नै विभाजन हुने स्थितिमा उनी प्रचण्डतिरै नफर्केलान् भन्न सकिन्न।
पार्टीमा विवाद बढ्दै गएपछि वरिष्ठ नेता माधव नेपाल समूहबाट मन्त्री भएका कृषिमन्त्री घनश्याम भुसाल र पर्यटन मन्त्री योगेशकुमार भट्टराई पनि संकटमा छन्। प्रधानमन्त्री र मन्त्रीसँगको छलफलदेखि मन्त्रिपरिषद् बैठकमा समेत प्रश्न सोधेर सही गलत भन्न सक्ने भुसाल मात्रै हुन्। भुसाल सुरुदेखि नै प्रधानमन्त्रीका आलोचक भए पनि पछिल्लो समय खरो रुपमा प्रस्तुत भने भएका छैनन्।
तर प्रचण्ड-नेपाल समूहले बोलाउने रणनीतिक गुटका भेलामा भने भुसाल पुग्ने गरेका छन्। यस्तै पर्यटन मन्त्री भट्टराई प्रधानमन्त्री वरिष्ठ नेता नेपाललाई समदूरीमा राखेका छन्। तर, भट्टराई प्रचण्ड-नेपाल समूहले बोलाउने भेलामा न्यून सहभागी हुन थालेपछि आशंका गर्न थालिएको छ।
‘पार्टीमा गुटका भेला हुन थालेपछि गुट परिवर्तन त गरेन भनेर सशंकित हुनुपर्ने अवस्था छ’, एक मन्त्रीले भने, ‘त्यसैले आफ्नो निकट नेतालाई नियमित भेटघाट छलफलमा सहभागी हुनुपर्ने बाध्यता छ।’
मन्त्रिपरिषद्मा प्रधानमन्त्रीसहित २० मन्त्री र तीन राज्यमन्त्री छन्। सञ्चार र सहरी मन्त्रालय रिक्त छ। सरकारमा भएका उपप्रधान तथा रक्षामन्त्री ईश्वर पोखरेलसहित ९ जना मन्त्री ओली समूहबाट, सात जना प्रचण्ड समूहबाट, दुई जना माधव नेपाल समूहबाट छन्। संघीय मामिला तथा सामान्य प्रशासन मन्त्री हृदयेश त्रिपाठी सूर्य चुनाव चिह्न लिएर चुनावमा विजयी भएका भए पनि स्वतन्त्र सांसदको रुपमा छन्।
समन्वयकारी भूमिकामा
पार्टीमा गुटका रणनीतिक भेलासम्म हुँदा मन्त्रीहरु गुपचुप रुपमा सहभागी हुँदै आएका थिए। जब पार्टीमा विवाद बढ्दै गई विभाजनकै सम्भावना बढ्यो। त्यसपछि भने सबै जसो मन्त्रीहरु एकताको पक्षमा उभिएका हुन्।
गत शुक्रबार कृषिमन्त्री घनश्याम भुसालले आफ्नै पहलमा आफ्नै निवास पुल्चोकमा केही मन्त्री तथा स्थायी कमिटी सदस्यहरुलाई बोलाए। पार्टी विभाजन गर्न नहुने भन्दै ११ जना मन्त्री तथा स्थायी कमिटी नेताको सन्देश लिएर अध्यक्ष ओली प्रचण्डलाई पनि भेटे। पार्टीभित्रको विवाद विभाजन नभई संवाद र छलफलमार्फत् समाधानको बाटो खोज्न भुसालले आग्रह गरेका थिए।
पछिल्लो समय मन्त्रीहरु गुटका भेलामा गएर आफूनिकट नेतालाई उचाल्नेभन्दा पार्टी एकताको पक्षमा माहोल बनाउन लागेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
