काठमाडौं- पार्टीभित्रको विवाद उत्कर्षमा पुगेपछि त्यसलाई पार्टी अध्यक्ष एवं प्रधानमन्त्री केपी ओली र अर्का अध्यक्ष पुष्पकमल दाहाल‘प्रचण्ड’ले संवाद मार्फत निरुपण गर्ने भएका छन्।
आइतबार भएको दुई अध्यक्षको छलफलले विवाद समाधानका लागि स्थायी कमिटीका चार सदस्यको अनौपचारिक कार्यदलले गृहकार्य गर्ने टुंगो लगाएको थियो। तर, कार्यदल मार्फत विवाद समाधन खोज्दा विषयवस्तु थप गिजोलिन थालेपछि दुई अध्यक्षले ‘वान टू वान’ मार्फत टुंगो लगाउने सहमति भएको हो। अब पार्टीभित्रका सबै विवाद मिलाउने जिम्मेवारी दुई अध्यक्षको काँधमा पुगेको छ।
अध्यक्षद्वयबीच सोमबार पनि डेढ घण्टा छलफल भएको थियो। ‘आज दुई अध्यक्ष बल्ल पार्टीको विषयवस्तुभित्र प्रवेश गुर्नभयो। अर्को दिन फेरि छलफल हुनेगरी सकिएको छ’, अध्यक्ष प्रचण्डको सचिवालय स्रोतले भन्यो, ‘अब पार्टीका विवाद दुई अध्यक्ष मात्रै बसेर मिलाउनु हुनेछ। छलफल सकारात्मक हुँदै गएको छ।’
आइतबार विवाद समाधान गर्न महासचिव विष्णु पौडेल, प्रदेश ५ का मुख्यमन्त्री शंकर पोखरेल, स्थायी कमिटी सदस्यद्वय जनार्दन शर्मा र वर्षमान पुनः सम्मेलित चार सदस्य अघोषित कार्यदल बनाइएको थियो। कार्यदलबाट समेत पार्टीभित्रको विवाद समाधान हुने नदेखेपछि दुई अध्यक्ष मात्रै बसेर मिलाउने सहमति गरेका छन्।
ओेली र प्रचण्ड-नेपाल समूहको आ-आफ्नो बटमलाइन
प्रधानमन्त्री एवं पार्टी अध्यक्ष केपी ओलीले कुनै हालतमा राजीनामा नदिने अडान दोहोर्याइरहेका छन्। यदि दुवै पदबाट राजीनामा दिने अवस्था आए सत्ता साझेदारका लागि कांग्रेससँग हात अघि बढाएका छन्। ओलीले पछिल्लो समय कांग्रेस नेताहरुसँगको भेटघाटलाई बढाउँदै लगेका छन्। नेकपा विभाजित हुने अवस्था आए आफ्नो निकटमार्फत पुरानो दल एमाले निर्वाचन आयोगमा दर्ता गरेको ओली इतर नेताहरुको बुझाई छ।
यस्तै अर्का अध्यक्ष प्रचण्ड तथा वरिष्ठ नेता माधव नेपाल समूहले ओलीले अध्यक्ष र प्रधानमन्त्री दुवै पदबाट राजीनामा दिनुपर्ने अडान राखेका छन्। ओलीले एक पद मात्रै छोड्दा पनि पार्टीमा सहज रुपमा काम गर्न नसक्ने भएकाले दुवै पद छोड्नुपर्ने सो समूहले बटमलाइन बनाएका छन्। अब त्याग गर्नुपर्ने अवस्थामा प्रधानमन्त्री ओली भएकाले अरुले त्याग गरेर सहमति नहुने एक सचिवालय सदस्यले बताए। पछिल्लो समय ओली प्रधानमन्त्री र पार्टी अध्यक्ष मध्ये एक पद छोड्न लचिलो हुँदै गएको विश्लेषण गर्न थालिएको छ।
तानातानका बीच ओली-प्रचण्डले सौहार्दपूर्ण वातावरणमा ‘वान टू वान’ संवादलाई अघि बढाएका छन्। चिनिया राजदूतले समेत नेकपा नेताहरुलाई भेटेर सक्रियता बढाएकाले विभाजनतिर जाने सम्भावना कम हुँदै गएको विश्लेषण गर्न थालिएको छ। पार्टी विवादको समाधान गर्ने दुई अध्यक्षकै काँधमा आएकाले कसरी सहमति हुन्छ, त्यो भने हेर्न बाँकी नै छ।
पार्टीमा यसरी विवाद बढ्दै गयो
सरकारका काम कारवाही र एमसिसीलाई लिएर पार्टीमा नेताहरुबीच विवाद बढ्दै गएको थियो। यसैबीच प्रधानमन्त्री ओलीले गत असार १४ मा मदन भण्डारी जन्मजयन्तीको अवसरमा आयोजित एक कार्यक्रममा नयाँ नक्सा जारी गरेपछि सरकारका विरुद्ध दिल्ली र काठमाडौंमा नेकपा नेताहरुले षडयन्त्रको तानाबाना बुनेको अभिव्यक्ति दिएपछि असन्तुष्ट नेताहरुका लागि मसला बनेको हो।
नेकपा नेताहरुलाई नै सरकार विरुद्ध षडयन्त्र गरेको ओरोप लगाएपछि पार्टी अध्यक्ष र प्रधानमन्त्री दुवै पदबाट ओलीको राजीनामा मागिएको हो। अध्यक्ष प्रचण्ड सहित वरिष्ठ नेता झलनाथ खनाल, माधव नेपाल, वामदेव गौतम ,नारायणकाजी श्रेष्ठ लगायत ३० भन्दा धेरै स्थायी कमिटी सदस्यले एउटै स्वरमा ओेलीको दुवै पदबाट राजीनामा मागेका थिए।
विवादकै बीच प्रधानमन्त्री ओली पक्ष र प्रचण्ड नेपाल पक्षले भेटघाटलाई बाक्लो बनाउँदै लगेका थिए। एकाएक गत बिहीबार स्थायी कमिटी बैठकका बीच प्रधानमन्त्री ओलीले चालु संसद अधिवेशन अन्त्य गर्ने निर्णय गरेपछि पार्टीमा तीव्र विवाद चुलिएको हो। विवाद मिल्नै नसक्ने अवस्था भएपछि २० गते र २२ गतेको स्थायी कमिटी बैठक स्थगित भइसकेको छ। अर्को स्थायी कमिटी बैठक २४ गते बस्नेगरी स्थगित भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779770158.png)
-1764146706.png)
-1779545841.jpg)
