काठमाडौं– प्रधानमन्त्री केपी शर्मा ओलीले प्रमुख प्रतिपक्षी दल नेपाली कांग्रेसका सभापति शेरबहादुर देउवालाई सत्तारोहणका लागि सन्देश पुर्याएका छन्। चार दिनअघि प्रधानमन्त्री ओलीले कांग्रेस सभापति देउवालाई भेटेको चर्चा सेलाउन नपाउँदै आइतबार बिहान नेकपा संसदीय दलका उपनेता सुवासचन्द्र नेम्बाङ बुढानीलकण्ठ पुगेका छन्। पार्टीभित्र कमजोर हुँदै गएका प्रधानमन्त्रीले प्रमुख प्रतिपक्षी दलको साथ खोज्न देउवा निवासमा नेम्बाङलाई पठाइएको बताइएको छ।
देउवालाई भेट्न पुगेका नेम्बाङले समसामयिक विषयमा छलफल भएको बताएपनि सत्ताका लागि प्रधानमन्त्रीले ‘हरियो झन्डा’ देखाएको बताइएको छ। पार्टीभित्र विवाद बढ्दै गएपछि नेकपाका दुई धार नै कांग्रेससँग नजिकिएको कांग्रेसका एक नेताले बताए।
‘नेकपा भित्र विवाद छ। आफ्नो दलभित्र विवाद साम्य गर्न नसकेको नेकपाले सभापतिलाई हरियो झण्डा देखाएको छ,’ उनले भने।
पछिल्लो समय सभापति देउवा निवासमा नेकपाका नेताहरुको आउने क्रम बढेको उनले बताए। उनले व्यङ्ग्यात्मक शैलीमा भने, ‘सभापति निवासमा बिहान-बेलुका कांग्रेसभन्दा नेकपाका नेताहरु बढी देखिन लागेका छन्।’
कांग्रेसका नेताहरु भने सरकार बनाउने खेलमा सहभागी नहुने बताउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
