काठमाडौं- शनिबार बिहान ११ बजेका लागि बोलाइएको स्थायी कमिटी बैठक स्थगित भएपछि दिनभर शान्त देखिएको सत्तारुढ दल नेपाल कम्युनिस्ट पार्टी (नेकपा) का नेताहरु साँझ परेसँगै तीव्र भेटघाटमा जुटेका छन्।
विवादका एक पक्ष प्रधानमन्त्री तथा पार्टी अध्यक्ष केपी ओलीले शनिबार साँझ राष्ट्रपति विद्यादेवी भण्डारीसँग भेटवार्ता गरेका छन्। भेटवार्ताका विषय खुलाइएको छैन।
नेकपाको गत असार १० गतेदेखि सुरु स्थायी कमिटी बैठकपछि राष्ट्रपति र प्रधानमन्त्रीबीचको भेटवार्ता तीव्र बनेको छ।
राष्ट्रपतिलाई भेट्न जानुअघि नै प्रधानमन्त्रीले बालुवाटारमा मन्त्रीहरुलाई बोलाएका थिए। बेलुका सात बजेका लागि बोलाइएको भेटवार्ताको खास विषयमा मन्त्रीहरुले अनभिज्ञता प्रकट गरेका छन्। तर, राज्यमन्त्री समेतलाई बोलाइएका कारण प्रधानमन्त्रीले गम्भीर परामर्श गर्न खोजेको अनुमान गरिएको छ।
विवादको अर्को पक्ष प्रचण्डले पनि आफ्नो निवास खुमलटारमा असन्तुष्ट पक्षसँग परामर्श गरिरहेका छन्। नेताहरु माधव नेपाल, झलनाथ खनाल, बामदेव गौतम, रामबहादुर थापा बादलको बैठक बसेको छ। उनीहरुले आफ्नो तर्फबाट पार्टी फुट्न नदिने निर्णय पनि गरेको छ। यद्यपि, सो समूहले ओलीले अनौपचारिक रुपमा पार्टी फुटाइसकेको निष्कर्ष निकालेको छ।
सो समूह आजै अर्को चरणको छलफलमा पनि बस्ने बताइएको छ।
नेकपा बैठकमा प्रधानमन्त्री र पार्टी अध्यक्षको रुपमा ओलीको राजीनामा माग भएपछि आन्तरिक कलह चुलिएको छ। विवादको गाँठो फुकाउन बिहीबार बैठक बसेपछि शनिबारका लागि स्थगित गरिएको थियो। तर, नेताहरुले सहमतिको बिन्दू पहिल्याउन सकेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
