काठमाडौं- वेस्ट इन्डिजसँगको टेस्टको तयारीमा रहेका इंग्ल्याण्डका क्रिकेटर साम कुरान अवस्थ भएपछि ‘सेल्फ आइसोलेसन’मा बसिरहेका छन्।
इंग्ल्याण्ड टिमले अभ्यासका लागि खेलेको खेलमा अविजित १५ रन बनाएका उनले आफू अस्वस्थ भएको महसुस गरेका हुन्। बुधबार रातिदेखि कमजोर महसुस भएको र डायरिया भएको इंग्ल्याण्ड क्रिकेट बोर्डले जनाएको छ।
अहिले स्वास्थ्यमा सुधार भइरहेको भए पनि बाँकी वार्म अप खेलमा उनी सहभागी हुने छैनन्। उनी अहिले टिम डाक्टरको प्रत्यक्ष निगरानीमा छन्। उनको कोरोना भाइरसको परीक्षण पनि हुने बताइएको छ। कतै बाहिर सम्पर्कमा नरहेकाले उनलाई कोरोना संक्रमण हुनै नसक्ने बताइएको छ।
तर पनि कोरोना माहामारीपछि रोकिएर सुरु हुन लागेको पहिलो टेस्टको अघि खेलाडी अस्वस्थ भएको समाचारले खेलमा असर पर्ने डर देखापरेको छ। यदि स्वस्थ भएर फर्किए पनि लामो समय खेलबाहिर रहेका कुरान अभ्यासमा पनि सामेल हुन नपाउँदा मैदानमा चोटको समस्यामा पर्न सक्नेछन्।
आउँदो आइतबार टिमका सबै सदस्यको कोरोना परीक्षण पुनः हुने बताइएको छ। जुलाई ८ देखि पहिलो टेस्ट सुरु हुनेछ। सिरिजको दोस्रो टेस्ट जुलाइ १६ देखि २० सम्म हुनेछ। तेस्रो तथा अन्तिम टेस्ट जुलाइ २४ देखि २८ सम्म हुने तय छ। यही सिरिजले क्रिकेटका अरु गतिविधि कसरी हुन्छन् भन्नेमा सहयाग गर्ने भएकाले पनि विशेष रुपमा हेरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1762935254.png)
