नयाँदिल्ली-भारत र पाकिस्तानले दुवै देशका जेलमा रहेका बन्दीहरुलाई रिहा गरेका छन्। दुवै देशले आ–आफ्ना देशका जेलमा रहेका माछा मार्ने माझी र थुनामा रहेका अन्य नागरिकलाई रिहा गरेका भारतको विदेश मन्त्रालयले जनाएकाे हो।
सन् २००८ मा दुवै देशले विभिन्न कारणबाट आ–आफ्ना देशका जेलमा परेका नागरिकहरुलाई छाड्ने बारेको एक सम्झौता गरेका थिए। त्यसैअनुसार हरेक वर्षको जनवरी १ र जुलाई १ मा रिहा गर्ने भनिएको थियो। त्यसअनुसार बुधबार पनि दुवै देशका नागरिकलाई छाडिएकाे भारतको विदेश मन्त्रालयले जनाएको छ।
बुधबार रिहा गरिएकामा भारतको जेलमा रहेका २ सय ६५ पाकिस्तानी नागरिक छन् भने अरु ९७ जना माछा मार्ने माझी छन्। उनीहरुलाई पाकिस्तानसमक्ष हस्तान्तरण गरिएकेा छ।
त्यसैगरी पाकिस्तानले पनि ५४ जना भारतीय नागरिक र अरु २ सय ७० जना माछा मार्ने माझीलाई भारतसमक्ष हस्तान्तरण गरेको छ।
उनीहरुलाई कूटनीतिक माध्यमबाट दुवै देशका अधिकारीहरुले एकै पटक छुटाएका थिए। बुधबार एकै समय पारेर भारत र पाकिस्तानका उच्च अधिकारीहरुले एक आपसमा दुवै देशका बन्दीहरुलाई हस्तान्तरण गरेका भारतको विदेश मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।