काठमाडौं-नेपालमा कोरोना संक्रमितको संख्या बढ्दो छ। पछिल्ला दिनमा दैनिकजसो कम्तीमा पनि पाँच सय संक्रमित भेटिइरहेका छन्।
संक्रमितको संख्या दैनिक बढ्दै जाँदा पिसीआर परीक्षण भने बढ्न सकेको छैन। कोरोना भए-नभएको पत्ता लगाउने प्रयोगशाला परीक्षणको विधि पिसीआर हो।
विज्ञहरुले दैनिक कम्तीमा पनि १५ हजारको हाराहारीमा पिसीआर परीक्षण हुनुपर्ने बताउँदै आएका छन्। तर परीक्षण भने ७ हजारभन्दा माथि उठ्न सकेको छैन।
त्यो पनि असार ६ गते एक दिन मात्र ७ हजार ४ सय १६ जनाको पिसीआर परीक्षण भएको थियो। त्यसपछि ६ हजार माथि जान नसकेको स्वास्थ्य तथा जनसंख्या मन्त्रालयले तथ्यांकले पनि देखाउँछ।
सरकारले असार १५ गतेबाट दैनिक १० हजारको परीक्षण गर्ने बताए पनि दैनिक ४ हजार हाराहारीमा मात्र परीक्षण हुन थालेको छ। केही दिन अघिसम्म ५ हजारदेखि ६ हजार परीक्षण हुने गरेकोमा अहिले झन् घट्दै गएको छ।
मन्त्रालयको तथ्यांक अनुसार असार १ मा ५ हजार ३ सय ६ जनाको पिसीआर गर्दा ४ सय ५१ जना संक्रमित भेटिएका थिए। असार २ मा ५ हजार ५५ जनाको पिसीआर गर्दा ३ सय ८०, असार ३ मा ६ हजार ३७ जनाको पिसीआर गर्दा ५ सय ८६ जना संक्रमित भेटिएका थिए।
तथ्यांकमा पिसीआर परीक्षण र संक्रमितको संख्या
असार १- पिसीआर ५३०६, संक्रमित ४५१
असार २- पिसीआर ५०५५, संक्रमित ३८०
असार ३- पिसीआर ६०३७, संक्रमित ५८६
असार ४- पिसीआर ५७४६, संक्रमित ६७१
असार ५- पिसीआर ६२३१, संक्रमित ४२६
असार ६- पिसीआर ७४१६, संक्रमित ३३१
असार ७- पिसीआर ६००८, संक्रमित ४२१
असार ८- पिसीआर ६१९८, संक्रमित ५३५
असार ९- पिसीआर ४९९५, संक्रमित ५३८
असार १०- पिसीआर ६८२८, संक्रमित ६२९
असार ११- पिसीआर ६५४३, संक्रमित ४३४
असार १२- पिसीआर ६५३४, संक्रमित ५९३
असार १३- पिसीआर ४६०६, संक्रमित ५५४
यो तथ्यांकले पनि संक्रमितको संख्या बढ्दै गएको तर पिसीआर परीक्षण भने बढ्न नसकेको देखाउँछ। स्वास्थ्य मन्त्रालयका सहप्रवक्ता डा समीरकुमार अधिकारीले परीक्षणको दायरा बढाउने गरी काम भइरहेको बताए।
सबैको पिसीआर गर्नेभन्दा पनि क्वारेन्टाइनमा रहेका व्यक्तिको पिसीआर परीक्षण पहिलो प्राथमिकतामा रहेको उनी बताउँछन्।
उनले भने, ‘परीक्षणको दायरा बढाउने गरी काम भइरहेको छ। हाल सबैको भन्दा पनि क्वारेन्टाइनमा रहेका व्यक्तिको परीक्षण बढी प्राथमिकतामा राखेका छौं।’
असार १५ देखि दैनिक १० हजारको पिसीआर परीक्षण हुने
असार १५ देखि प्रत्येक दिन १० हजारको संख्यामा पिसीआर परीक्षण गर्ने स्वास्थ्य मन्त्रालयको तयारी छ। निजी ल्याबले ३ हजार र बाँकी सरकारी ल्याबबाट गरी प्रतिदिन १० हजारको पिसीआर गर्ने मन्त्रालयले जनाएको छ।
हाल भएका ल्याबमा जनशक्ति थपेर २४सै घन्टा सञ्चालन गरेर केही परिणाम दिन सकिने मन्त्रालयले जनाएको छ। परीक्षण निजी क्षेत्रले गर्ने भए पनि स्वाब संकलन भने सरकारले नै गर्नेछ। मन्त्रालयका अनुसार परीक्षणको शुल्क पनि सरकारले नै दिनेछ। प्रत्येक प्रदेशमा प्रतिदिन एक हजारका दरले परीक्षण गर्न दिने मन्त्रालयको योजना छ।
निजी प्रयोगशालालाई परीक्षण गर्न अनुमति दिनका लागि मापदण्ड राष्ट्रिय जनस्वास्थ्य प्रयोगशालाले बनाएको छ।
दैनिक १० हजारसम्म परीक्षण गर्ने भने पनि नमुना कति संकलन हुन्छ, त्यसमा भर पर्ने मन्त्रालयका सहप्रवक्ता डा अधिकारीले बताए। उनले भने, ‘दैनिक १० हजारसम्म पिसीआर परीक्षण गर्ने तयारी हो। तर स्याम्पल कति संकलन हुन्छ, त्यो अनुसार पनि हुन्छ।’
‘सरकारले ढिला गर्यो’
मन्त्रालयले असार १५ देखि प्रत्येक दिन १० हजारको संख्यामा पिसीआर परीक्षण गर्ने बताए पनि विज्ञहरु भने सरकारले ढिला गरेको बताउँछन्।
इपिडिमियोलोजी तथा रोग नियन्त्रण महाशाखाका पूर्वनिर्देशक डा बाबुराम मरासिनीले संक्रमितको संख्या बढेको समयदेखि पिसीआर परीक्षण बढाउन सकेको भए समयमै नियन्त्रण गर्न सकिने बताए।
‘क्वारेन्टाइनबाट धमाधम मानिस फर्कंदैछन्। सरकारले बल्ल परीक्षणको दायरा बढाउँदैछ,’ उनी भन्छन्, ‘यो ढिलो भयो। पहिले नै फटाफट गर्नुपर्थ्याे। पहिले दायरा बढाएको भए आज कोरोना नियन्त्रण गर्न सहज पनि हुने थियो।’
क्वारेन्टाइनमा रहेका सबै व्यक्तिलाई पिसीआर परीक्षण नगर्ने सरकारको नीतिले अधिकांश मानिस बिना पिसीआर घर फर्किएका छन्। सरकारले बनाएको निर्देशिकाले लक्षण देखिएका व्यक्तिलाई मात्र परीक्षण गर्नु भन्छ।
डा मरासिनी हाल भइरहेको पिसीआरको दायरा निकै कम भएको भन्दै दैनिक कम्तीमा १५ हजार जनाको परीक्षण हुनुपर्ने बताउँछन्।
सरकारले १० वटा प्रयोगशाला थप गर्ने निर्णयसमेत गरेको छ। योसँगै मुलुकभर अबदेखि ३३ स्थानमा पिसीआर परीक्षण गरिने छ। तर यो पर्याप्त नभएको डा मरासिनीले बताए। उनका अनुसार नेपालमा बढिरहेको संक्रमितको संख्या र जोखिमका अनुसार प्रयोगशाला १ सय पुर्याउनुपर्ने उनले बताए।
सरकारले परीक्षणको दायरा नबढाएर कोरोनाले राष्ट्रव्यापी महामारी निम्त्याउने जोखिम बढेको उनी बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787673555.png)
-1787673999.jpeg)
-1786602170.png)
-1786513116.png)
