काठमाडौं- साउदीस्थित नेपाली दूतावासले कोरोना संक्रमणको असहज परिस्थितिका कारण तथा करार अवधि पुरा गरी स्वदेश फर्कने युवाहरुलाई देशमै काम गर्न आग्रह गरेको छ।
विदेशमा आर्जन गरेको ज्ञान, सीप, अनुभव र पूँजीबाट मूलुकले धेरै अपेक्षा गरेको भन्दै स्वदेशमै केही गर्न आग्रह गरिएको हो।
‘विदेश बसाइका क्रममा यहाँहरुले तिता‚ मीठा र अप्ठ्याराहरु झेल्दै लामो अनुभव हासिल गर्नुभएको छ। यहाँहरुले हाँसिल गरेको ज्ञान, सीप, अनुभव र पूँजीबाट मुलुकले धेरै अपेक्षा गरेको छ’ दूतावासले विज्ञप्तीमा भनेको छ।
सरकारले नेपालमा कृषि क्षेत्रको आमूल विकास गरी उत्पादनको आयातमाथिको निर्भरतालाई कम गर्ने लक्ष्य अघि सारेकाले कृषिमा संलग्न भई आत्मनिर्भर बन्न दूतावासले सुझाएको छ।
कतिपय अवस्थामा कोरोनाले अप्ठ्यारो परिस्थिति सिर्जना गरे पनि आफ्नो देशमा फर्किएर देशको माटोमा केही गर्ने अवसर समेत जुटाइदिएको दूतावासको भनाइ छ।
‘देशको थुप्रै उर्वर भूमि वर्षौंदेखि उत्पादनहीन अवस्थामा रहेको छ। मुलुकलाई चाहिने महत्वपूर्ण श्रम शक्ति मुलुक बाहिरको रोजगारीमा रहेको हुँदा यो क्षेत्र ओझेलमा परेको छ। स्थानीय स्तरमा समेत रोजगारीका अवसर सृजना गरी देश विकासमा महत्वपूर्ण भूमिका निर्वाह गर्ने युवा जनशक्ति मुलुकको विकासमा प्रत्यक्ष संलग्नता आवश्यक रहेको छ। कोरोना संक्रमणको जटिल परिस्थितिले यो अवसर जुटाइदिएको छ’ विज्ञप्तिमा उल्लेख छ।
वैदेशिक रोजगारीको अनुभव समेतका माध्यमबाट व्यवसायिक कृषि तथा पशुपालन, स्थानीय स्तरमा रोजगारी सृजनाका अन्य उपायहरु तथा स्थानीय स्तरमा सामाजिक र आर्थिक पूँजी परिचालन गरी राष्ट्रिय अर्थतन्त्रमा टेवा पुर्याउन सकिने बताइएको छ।
नेपाली श्रमिकहरुको गन्तव्य मुलुक साउदीबाट शुक्रबार १५४ नेपाली स्वदेश फर्किएका छन्। कोरोनाका कारण समस्या परेर स्वदेश फर्कनुपर्ने थुप्रै नेपालीहरु उडान कुरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
