काठमाडौं- राष्ट्रिय मानव अधिकार आयोगले देशभर सञ्चालनमा रहेका क्वारेनटाइनहरु मापदण्ड अनुकुल नभएको निष्कर्ष निकालेको छ। कोभिड १९ र बन्दाबन्दीको अवधिमा मानव अधिकारको अवस्था प्रारम्भिक अनुगमन प्रतिवेदन सार्वजनिक गर्दै आयोगले देशभरका क्वारेनटाइनप्रति सरकारको ध्यानाकर्षण पनि गराएको छ।
सरकारका विभिन्न मन्त्रालयलाई पनि लकडाउनको समयमा हुने मानव अधिकार हननका विषयमा काम गर्न पनि सिफारिस गरेको छ। लकडाउनको अवधिमा बढ्दै गएका महिला हिंसाको न्यूनीकरणका लागि प्रभावकारी कदम चाल्न, क्वारेन्टाइनभित्रको व्यवस्थापनलाई थप व्यवस्थित गर्न तथा सिमानामा आई लामो समयदेखि क्वारेन्टाइनमा बसेका नागरिकहरूको सम्बन्धमा सर्वोच्च अदालतको अन्तरिम आदेश पालना गरी मानवअधिकारको सम्मान, संरक्षण र परिपूर्तिको लागि संघर्ष, प्रदेश र स्थानीय सरकारबीच आवश्यक समन्वय गर्न आयोगले भनेको छ।
यस्ता छन् अनुगमनका निष्कर्ष:
- नचाहने र बसिरहेकाहरू पनि सुरक्षाकर्मी र स्वास्थ्यकर्मीको आँखा छली उम्किने, भाग्ने गरेको पाइएकोले समाजमा सङ्क्रामक रोग अझ बढी फैलिन सक्ने सम्भावना देखियो।
- हावाहुरीले मोरङ जिल्लाको मिक्लाजुङ गाउँपालिका- ४ हात्तीमारास्थित सेनाको सूर्यदल गणमा राखिएको क्वारेन्टाइनमा बनाइएका ४० वटा पाल उडाएर क्षति पुगेको पाइयो।
- हुरीका कारण बिजुली र इन्टरनेट अवरुद्ध भएको र खानेपानीका फिल्टरहरूसमेत क्षतिग्रस्त भएको पाइयो।
- प्रदेश नं २ मा रहेको नारायणी अस्पतालको आइसोलेशनको क्षमता ७० जनाको मात्र रहेकोमा बिरामीको सङ्ख्यामा अत्याधिक वृद्धि भएकोले समस्या सिर्जना भएको भन्ने अनुगमन टोलीले जानकारी प्राप्त गरेको थियो।
- २०७७ जेठ ५ गते बाँकेको नरैनापुर गाउँपालिकामा कोभिड १९ बाट प्रभावितहरूको अवस्था अनुगमन गर्दा सङ्क्रमितको संङ्ख्या ५५ जना पुगिसकेको,
- भारतसँगको खुला सीमा नाकाबाट हालसम्म पनि मानिस आउने क्रम जारीरहेको र आएका केही व्यक्तिहरू पनि लुकिछिपी बसेको, नरैनापुर क्षेत्रमा १३ स्थानमा सात महिलासहित ७४१ जना व्यक्तिहरूलाई विभिन्नक्वारेन्टाइनमा राखिएको,
- क्वारेन्टीन सञ्चालन तथा व्यवस्थापन गर्न बनेको मापदण्ड २०७६ अनुसारको मापदण्ड पूरा नभएको,क्वारेन्टाइनमा राखिएका ब्यक्तिहरूले पालना गर्नुपर्ने आचारसंहिता, जस्तैः दुरी बनाएर बस्नुपर्ने, बाहिरका ब्यक्तिहरूसँग सम्पर्क नगर्ने, तोकिएको स्थानमा बस्नुपर्ने लगायतका नियमहरू पालना नभएको,क्वारेन्टाइनमा बसेकाहरू साँझको बेला शौचालय जाने बहानामा सो स्थानबाट निस्की आफूखुसी रातभर घर गई बस्ने गरेको,क्वारेन्टाइनमा मापदण्ड विपरीत एकै कोठामा धेरै व्यक्तिहरू रहेको पाइयो।
- नरैनापुर गाउँपालिकामा रहेका आइसोलेन रक्वारेन्टाइनमा क्षमताभन्दा बढी सङ्ख्यामा मानिसहरू राख्नुपर्ने अवस्था भएकोले न्यूनत्तम आवश्यकताअनुसार व्यवस्थित गर्न आवश्यक भौतिक पूर्वाधार र आर्थिक समस्या भएको गाउँपालिकाका अध्यक्षबाट जानकारी पाइयो।
- इलाका प्रहरी कार्यालय भगवानपुर प्रहरी निरीक्षक मानबहादुर जिसी र स्थानीयवासीका अनुसार समयमै उपचार गर्न अस्पताल लान नसकेको कारण कोरोना लागेका बिरामी नरैनापुर ५ नयाँबस्तीका २५ वर्षीय व्यक्तिको मृत्यु भएको जानकारी पाइयो। निजको मृत्यु भएको कागजको मुचुल्कामा स्थानीय जनप्रतिनिधिहरूले सनाखत गर्न नमानेकोले जिल्ला समन्वय समितिका प्रमुख अजय श्रीवास्तवले सनाखत गर्नु भएको र मृतकको लासलाई स्काभेटरले खाल्टो खनेर स्काभेटरमै लगी दाहसंस्कार गरिएको जानकारी प्राप्त भयो।
- सुनसरी जिल्लाको विभिन्न मस्जिदमा रहेका व्यक्तिहरूलाईक्वारेन्टाइनमा राख्ने कार्यको थालनी गरिएको,
- सुनसरी जिल्लामा ८१ वटा मस्जिद रहेको र भारतसँग खुला सीमा रहँदा जोखिम बढी भएको देखियो। मस्जिदहरूमा स्वास्थ्य प्रोटोकल अनुसारको समाजिक दूरीसमेत कायम नहुँदा खाली गरिएको र मस्जिदमा रहेकोहरूको आरडिटी परीक्षण नेगेटिभ भए पनिक्वारेन्टाइनमा राखिएको थियो।
- विभिन्न जिल्लाहरूमा मस्जिदमा रहेका जमाती एवम् अधिकांश मुश्लिम धर्मावलम्बीमा कोरोना भाइरसको सङ्क्रमण पाइएकोले राष्ट्रिय मुस्लिम आयोगका अध्यक्षबाट पटक–पटक आ आफ्नो घरमा सामाजिक दुरी कायम गरेर नवाज पढ्दै मुश्लिमहरूको महान् चाड इद् मनाउन आह्वान भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
