काठमाडौं- भारतीय भन्सार सहयोगीको अवरोधपछि पछिल्लो २४ घण्टायता भैरहवा भन्सारबाट वस्तु व्यापार बन्द भएको छ। भन्सार सहयोगीले अवरोध गर्दा शुक्रबार दिँउसो १:३० बजेपछि भैरहवा भन्सार हुँदै भारततर्फबाट कुनै पनि मालसामान आएको छैन।
भारतबाट आएर भैरहवा भन्सारमा सहयोगीको रूपमा काम गर्ने व्यक्तिहरूले भारतीय भन्सारमा अवरोध गरेका कारण वैदेशिक व्यापार रोकिएको हो। भन्सारमा एजेन्टका अतिरिक्त भन्सार सहोगीका रूपमा नेपाली तथा भारतीय नागरिकले काम गरिरहेका छन्। त्यसमध्ये भारतीय नागरिकले काममा अवरोध गरेका हुन्।
गत विहीबार बेलुका भारतीय सहयोगीलाई सीमाना केही अपरिचित नेपालीहरूले हातपात गरी परिचयपत्र खोसेर लगेका कारण उनीहरूले विरोधस्वरूप व्यापार बन्द गराएको भारतयीय पक्षले जनाएको छ। यस विषयमा भारतीय राजदूतले वाणिज्य, परराष्ट्र र गृह सचिवसँग समेत छलफल गरेका छन्।
दुई देशको व्यापार अवरुद्ध भएपछि भन्सार विभागका महानिर्देशक सुमन दाहालले रूपन्देहीका प्रमुख जिल्ला अधिकारी तथा भैरहवा भन्सार प्रमुखलाई सम्पर्क गरी भन्सार सहयोगीका लागि आवश्यक सुरक्षा प्रबन्ध मिलाउन आग्रह गरेका छन्। दाहालले परिपचयपत्र सहित आउने भारतीय सहयोगीलाई नेपाल आउने अनुमति दिन र यही विषयमा समकक्षी भारतीय भन्सार प्रमुख र डिस्ट्रिक्ट म्याजिस्ट्रेटलाई जानकारी गराउन पनि भनेका छन्।
'केही समयमा नै भन्सार पुन: सञ्चालन हुने जानकारी पाएका छौँ,' दाहालले भने, 'तत्कालका लागि अवरोध हट्ने र दुई देशको व्यापार सहज बन्ने विश्वास लिएका छौँ।' भैरहवा वीरगञ्जपछिको दोस्रो ठूलो व्यापारिक नाका हो।
'भारतबाट आउने मालसामानको भन्सार घोषणा गराउने, जाँचपास तथा सामान ढुवानीमा सहयोग गर्न नेपाली र भारतीय नागरिकले काम गर्ने गरेका छन्,' भन्सार विभागका महानिर्देशक दाहालले भने। नेपाली एजेन्ट तथा उनका सहयोगीले भने भारतीय नागरिकहरू नेपाल आएर काम गरेको मन नपराउने भएकाले बेलाबखत समस्या हुने गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
