काठमाडौं- कोरोनाका कारण ठूलो संख्यामा वैदेशिक रोजगारीमा गएका युवाहरू समस्यामा परेका छन्। महिनौंदेखि उनीहरू अलपत्र अवस्थामा अड्किएका छन्।
सरकारले समस्यामा परेका श्रमिकहरूलाई स्वदेश फर्काउने निर्णय गरेको छ। अब केही दिनमै विदेशबाट युवाहरू स्वदेश फर्काउन सुरु गरिने उल्लेख गरिएको छ।
विदेशबाट फर्काइएकाहरूमध्ये पैसा तिरेर बस्न सक्नेलाई होटल क्वारेन्टाइनमा राखिने र समस्या परेर फर्किएकाहरूलाई स्थानीय तहले तोकेको क्वारेन्टाइनमा राख्ने उल्लेख गरिएको छ। तर विदेशबाट हजारौंको संख्यामा फर्किने युवाहरूका लागि प्रदेश- २ मा व्यवस्थित क्वारेन्टाइन नभएको मुख्यमन्त्री लालबाबु राउतले बताए।
विदेशबाट प्रदेश २ मा कति युवाहरू फर्कन्छन्?
‘प्रदेश नम्बर २ बाट विदेशिनेहरू सामान्य अवस्थाका युवाहरू बढी छन्। विशेषगरी उनीहरू लेवर कामका लागि मलेसियालगायत खाडी मुलुकमा पुगेका छन्’ मुख्य मन्त्री राउतले भने।
उनका अनुसार मलेसिया र खाडीलगायतका मुलुकमा मात्रै प्रदेश नम्बर २ बाट ५ लाखभन्दा बढी युवाहरू विदेशिएका छन्। विश्वमा महामारीका रुपमा फैलिँदै गएको कोरोना भाइरसका कारण पनि मलेसिया र खाडीलगायतका मुलुकमा रहेका श्रमिक वर्ग नै सबैभन्दा बढी मारमा परेका छन्। यी मुलुकहरूमा लाखौँ नेपाली श्रमिकहरूले रोजगारी गुमाएर फर्किने अवस्था सिर्जना भएको छ।
वैदेशिक रोजगार व्यवसायी संघले गरेको एक अध्ययनअनुसार मलेसिया र खाडीलगायतका मुलुकबाट मात्रै ५ लाख युवाहरू रोजगारी गुमाएर फर्किने अवस्था रहेको देखिएको छ। वैदेशिक रोजगारीमा जाने युवाहरूको अवस्था हेर्दा पनि सबैभन्दा बढी संख्यामा युवाहरू प्रदेश नम्बर २ बाट नै विदेशिने गरेको वैदेशिक रोजगार विभागको तथ्यांकले देखाउँछ।
जसले गर्दा पनि रोजगारी गुमाएर वा विभिन्न समस्याका कारण प्रदेश नम्बर २ मा हजारौं युवाहरू तत्काल फर्कन सक्ने देखिएको छ। यसरी विदेशबाट फर्किने युवाहरूका लागि व्यवस्थित क्वारेन्टाइनको निमार्णमा सरकारले ध्यान पुर्याउन नसकेको मुख्यमन्त्री राउतको भनाइ छ।
मुख्यमन्त्री राउत भन्छन्, ‘स्रोत साधनले भ्याएसम्म हामी कोरोनासँग जुधिरहेका छौं तर हामीले तयार पारेको क्वारेन्टाइन क्वारेन्टाइनजस्तो छैन। विदेशबाट आउनेहरूलाई हामी स्वागत गर्न तयार छौं तर कहाँ राख्ने? उचित क्वारेन्टाइन छैन।’
केन्द्र सरकारको असहयोग
कोरोना रोकथाम तथा व्यवस्थापनमा केन्द्र सरकारले प्रदेशलाई असहयोग गरेको मुख्यमन्त्री लालबाबु राउतको आरोप छ।
‘हामीसँग दक्षजनशक्तिको अभाव छ, स्रोतसाधन सिमित छ। जहाँसम्म संघीय सरकारको सवाल छ। संघीय सरकारले कति पैसा पठाएको छ भनेर सोध्नुहुन्छ भने जवाफ आउँछ शून्य’ उनले भने।
यो प्रदेशका जनताको रक्षाका लागि आफ्नो स्रोत साधनले भ्याएसम्म राहत वितरणलगायत सहयोग पुर्याएको उनको भनाइ छ।
केन्द्र सरकारले प्रदेशमा के आवश्यक छ भनेर एकपटक पनि सम्पर्क नगरेको भन्दै मुख्यमन्त्री राउतले दुःख व्यक्त गरे। स्रोत साधन तथा दक्षजनशक्तिको अभावका कारण क्वारेन्टाइन व्यवस्थित बनाउन नसकिएको मुख्यमन्त्री राउतले बताए।
विदेशमा समस्या परेका युवाहरूलाई सरकारको उपेक्षा
सरकारले विदेशमा समस्यामा परेका नेपालीहरूलाई तत्काल उद्धार गर्नुपर्नेमा स्वदेश फर्किन्छु भन्दा अवरोध खडा गरेको भन्दै मुख्यमन्त्री राउतले आपत्ति जनाए।
उनले भने, ‘जसले पठाएको रेमिट्यान्सका कारण यहाँ बस्नेहरू चिल्लो गाडीमा चढेर हिँडेका छन्। जसले विदेशमा पसिनासँग साटेको पैसाले कुल गार्हस्थ्य उत्पादनमा ठूलोे योगदान पुर्याएको छ‚ उनीहरूलाई नै स्वदेश फर्कन्छुभन्दा अवरोध गरियो।‘
वैदेशिक रोजगारबाट फर्किएकाको सीप प्रदेशमै परिचालन गर्ने तयारी
प्रदेश नम्बर २ बाट विदेशिनेको परिवार विशेष गरेर कृषि पेशामा आबद्ध छ। प्रदेश नम्बर २ कृषिका लागि उर्वर समेत भएकाले विदेशबाट फर्किएकालाई कृषि पेशामा आबद्ध गराउने योजना बनाएको मुख्यमन्त्री राउतको भनाइ छ। उनीहरूका लागि सरलकर्जाको व्यवस्था गर्ने तथा आवश्यक तालिम उपलब्ध गराउने तयारी गरिएको छ।
विदेशबाट फर्किएकालाई उनीहरूको सीपअनुसारको रोजगारी उपलब्ध गराउने र प्रदेशभित्रै विदेशबाट सिकेर आएको सीप परिचालन गरिने उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
