फाइल तस्बिर
रुकुम- रुकुमको चौरजहारी घटनापछि भेरी नदीमा बेपत्ता भएकामध्ये थप एक युवकको शव फेला परेको छ। योसँगै सो घटनामा परी मृत्यु भएका ६ जनाकै शव भेटिएको हो। मंगलबार साँझको समयमा स्थानीहरुले एक बेपत्ता व्यक्तिको शव भेटिएसँगै मृतक सबैको शव भेटिएको हो।
भेरी नगरपालिका ११ बस्ने १८ वर्षीय गोविन्द शाहीको शव २० गते भेटिएको हो। साँझ करिब ६ बजे भेरी नगरपालिका-१३ स्थित भेरी नदीमा स्थानीय बासिन्दाहरुले फेला पारेको प्रहरीले जानकारी दिएको हो।
जाजरकोटको भेरी नगरपालिका–४ रानागाउँका २१ वर्षीय युवक नवराज विक र छिमेकी जिल्ला पश्चिम रुकुमको चौरजहारी नगरपालिका–८ सोतीकी १७ वर्षीया मल्ल थरकी एक किशोरीबीच प्रेम बसेको थियो।
तल्लो जातको केटा भएको भन्दै केटीका परिवारले उनीहरूको विवाह अस्वीकार गरेपछि १९ जना युवा‚ केटीलाई लिन केटीको गाउँ गएपछि स्थानीयले घेरा हालेर लखेटेका थिए। यसरी लखटिएका १२ जना घाइते भए। ६ जनाको भने मृत्यु भएको थियो।
गत बिहीबार नदीमा लोकेन्द्र सुनारको शव भेटिएको थियो। यसअघि नवराज विकसहित चौरजहारी नगरपालिका–१ टीकाराम सुनार र भेरी नगरपालिका–४ का गणेश बुढा, लोकेन्द्र सुनारको शव भेरी नदीमा भेटिएको थियो। उनीहरूको हत्या भएको र दोषीलाई कारबाहीको दायरामा ल्याउन माग गर्दै देशभर विरोध भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
