काठमाडौं- निजी विद्यालयहरुको छाता संगठन एन-प्याबसनले सरकारले प्रस्तुत गरेको २०७७ ⁄ ०७८ को बजेटले विभेद गरेको बताएका छन्। एन-प्याब्सनले शुक्रबार प्रेस विज्ञप्ति जारी गर्दै निजी लगानीका विद्यालयका सञ्चालक तथा लगानीकर्ताहरु निराश भएको जनाएको हो।
‘मुलुक कारोनाको महामारीले गर्दा स्तब्ध भएको वर्तमान अवस्थामा निजी लगानीमा सञ्चालनमा रहेका हज्जारौँ शिक्षालय र सम्बद्ध लगानीकर्ता, यसमा आश्रित लाखौं शिक्षक कर्मचारी, विद्यार्थी तथा अभिभावकसमेत प्रस्तुत बजेटले देखाएको विभेदका कारण आश्चर्यमा परेका छन्,' विज्ञप्तिमा भनिएको छ।
निजी विद्यालयहरुले पुर्याएको योगदान, स्व–पुँजी परिचालन, स्वरोजगारी (अधिकतम महिलाका क्षेत्रमा रोजगारी), प्रिस्कूलका माध्यमबाट अभिभावकहरुमा पुगेको सहयोग, ग्रामीण तथा दुरदराजमा निजी विद्यालयहरुको पहुँच आदि जस्ता सकारात्मक विषयमा सरकारले नजर अन्दाज गरेको एनप्याबसनको दाबी छ। वर्तमान लकडाउनको समयमा र बजेट प्रस्तुत गर्नुभन्दा अगावै निजी लगानीमा सञ्चालनमा रहेका शिक्षालयहरुको छाता सङ्गठनहरु, निजी शिक्षालयमा कार्यरत शिक्षक ⁄ कर्मचारीहरुको छाता सङ्गठन, अभिभावकहरुको छाता सङ्गठन लगायतका सरोकारवाला निकायहरुको कैंयौ पटकको छलफल तथा विचारविमर्शबाट हालको अवस्थामा विद्यार्थीहरूलाई पर्ने मानसिक दबाब तथा असरलाई न्यूनीकरण गर्ने उपायहरूका बारेमा जिम्मेवार पक्ष त्यसतर्फ अग्रसर हुने निचोड निकाल्दै गरेका प्रयासका बारेमा उपप्रधानमन्त्री, शिक्षामन्त्री, अर्थमन्त्रीलगायत सम्बन्धित पक्षहरुलाई पटकपटक लिखित तथा मौखिक जानकारी गराइएको भए पनि बजेटले आफूहरुलाई बेवास्ता गरेको उसको दाबी छ।
'निजी विद्यालय सञ्चालनमा बर्तमान अवस्थामा परेको असर र यस क्षेत्रलाई तत्कालका लागि गर्नुपर्ने संरक्षण तथा प्रत्याभूतिका बारेमा संयुक्त जानकारी गराईएको थियो। तर, यसको बाबजुद विद्यालय सञ्चालक, लाखौं विद्यार्थी, अभिभावक तथा यसमा आश्रित परिवारहरुको भद्र प्रस्तुतिको बेवास्ता गर्ने वर्तमान सरकारको रबैयाप्रति एनप्याब्सन घोर आपत्ति प्रकट गर्दछ,' विज्ञप्तिमा भनिएको छ।
निजी शिक्षा प्रदायकहरुलाई सदैव सौतेलो आँखाले हेर्ने सरकारले लगानी कर्ता, अध्ययनरत, अध्यापनरत, रोजगाररत आश्रित परिवारहरु र आम अभिभावकहरुमा कोरोनाले कुनै अर्थ राखेको छैन भन्ने मानसिकताका साथ प्रस्तुत भएको बजेटले दुनियाँ हसाउने काम गरेको समेत उसको टिप्पणी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
