काठमाडौं- सरकारले आगामी आर्थिक वर्ष २०७७/०७८ मा पनि देशभर विस्तार भइरहेको फोरजी विस्तारलाई निरन्तरता दिने भएको छ।
अर्थमन्त्री युवराज खतिवडाले आगामी आर्थिक वर्ष २०७७/०७८ को बजेट मार्फत फोरजी विस्तारलाई निरन्तरता दिने बताएका हुन्।
अहिले नेपाल टेलिकमले देशभरी फोरजी विस्तार गरिरहेको छ। ७७ जिल्ला सदरमुकाम र सहरी क्षेत्रमा टेलिकमको फोरजी सेवा सुरु भइसकेको छ।
२०७३ पुस १७ देखि पोखरा र काठमाडौंबाट फोरजी सेवा सुरु गरेको टेलिकमले अहिले ७७ वटै जिल्लामा फोरजी सेवा पुर्याइसकेको छ। २०७३ मा परीक्षण गर्दा टेलिकमले थ्रीजी सेवा सञ्चालनमा रहेको टावर र पावरमा केही एन्टेना र रेडियो उपकरण जोडेर फोरजीको औपचारिक सुरुवात गरेको थियो।
नेपाल टेलिकम अहिले टुजी, २.५ जी, थ्रीजी, फोरजी, एड्भान्स फोरजी (एलटी)हुँदै अहिले फाइभजीको चरणमा जाने तयारीमा छ।
टेलिकमले झन्डै १९ अर्ब रुपैयाँमा फोरजी विस्तारको काम गरिरहेका छ।
टेलिकमले ८ अर्ब पूर्वाधार निर्माण र बाँकी ११ अर्बभन्दा बढी रकम फोरजीमा खर्च गर्ने गरी दुई पक्षीय सम्झौता गरेको थियो। टेलिकलमले यही पूर्वाधरबाट फाइभजी चलाउने भन्दै आएको छ।
टेलिकमले झन्डै १९ अर्ब रुपैयाँ भित्रबाट ६ सय ४० वटा टावर पनि निर्माण गर्ने छ।
जसमध्ये अहिलेसम्म ३ सयभन्दा बढी बिटिएस टावर निर्माण भइसको छ।
तर, टेलिकमले सम्झौतामा अमेरिका, क्यानडा, युरोप, फिनल्यान्ड र अस्ट्रेलियामा बनेको उपकरण प्रयोग गर्ने उल्लेख भए पनि केही एन्टेना चिनिया प्रयोग गरिरहेका छ।
नेपाल टेलिकमले २०७३ पुस १७ मा पोखरा र काठमाडौं उपत्यकामा फोरजी सेवा सुरु गरेको थियो। सोही आयोजनालाई दीर्घकालीन कार्ययोजनाअन्र्तगत नेपाल टेलिकममार्फत् देशभरका ६५ लाख ग्राहकमा फोरजी विस्तार गर्ने प्रक्रिया झन्डै दुई वर्ष अगाडिदेखि नै सुरु भएको थियो।
यसका लागि टेलिकमकी पूर्व प्रबन्ध निर्देशक कामिनी राजभण्डारीको नेतृत्वमा रहेको टेलिकमले स्पेसिफिकेसन तयार गराई ग्लोबल टेण्डरको मूल्यांकन भइसकेको बेला फोरजी बिस्तारमा आर्थिक हिनामिना भएको भन्दै अख्यिारमा उजुरी परेको थियो।
उक्त उजुरीमा अख्तियारले झन्डै १० महिनापछि २०७५ कात्तिममा सफाइ दिएको थियो। त्यससँगै टेलिकमले २०७५ पुस १० मा रेडियो एक्सेस नेटवर्क र्यामको काम हङकङस्थित सिसिएसआई कम्पनी र कोर नेटवर्कको काम चिनियाँ कम्पनी जेडटिईलाई १९ अर्बको ठेक्का दिएको थियो। सोही आधारमा कम्पनीले अहिले ७७ जिल्लामै फोरजीको ‘सफ्ट लन्च’ गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789792206.jpg)
-1786602170.png)
