काठमाडौं- इंग्लिस प्रिमियर लिग क्लबहरु एक कदम अघि बढेर सामूहिक अभ्यासमा एकअर्कालाई छुन पाइने गरी अघि बढ्न राजी भएका छन् तर प्रिमियर लिगका भिन्न तीन क्लबका चार जनामा भने कोरोना भाइरस (कोभिड १९) को संक्रमण देखिएको छ।
गएको हप्ता व्यक्तिगत अभ्यास सुरु गर्नुअघि खेलाडीहरुको स्वास्थ्य परीक्षण गरिएको थियो। यसअघि आठ जनामा कोरोना संक्रमण देखिएको थियो। पछिल्लो तेस्रो चरणमा १ हजार ८ जनाको परीक्षण गर्दा चार जनामा संक्रमण देखिएको हो।
अहिले लिग सुरु गर्ने दोस्रो चरणको प्रयासमा खेलाडीहरुले अभ्यासका बेला एकअर्कालाई छुने र सामान्य ट्याकल गर्न पाउने गरी क्लबहरु राजी भएका हुन्। अभ्यासमा एक कदम अघि बढे पनि रोकिएको लिग सुरु हुने यकिन मिति भने तय भएको छैन।
अहिलेसम्म क्लबहरुमा आबद्ध २ हजार ७ सय ५२ जनाको परीक्षण गर्दा १२ जनामा कोरोना संक्रमण देखिएको हो। संक्रमण देखिएकाहरु सात दिनको आइसोलेसनमा छन्।
अहिले प्रिमियर लिग खेलाडी र पदाधिकारीहरुको हप्तामा दुई पटक कोरोना भाइरसको परीक्षण भइरहेको छ। अब परीक्षणको चौथो चरणमा एक क्लबले ६० जनाको परीक्षण गर्न पाउने व्यवस्था मिलाइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
