काठमाडौं- सरकारले बिहीबार संघीय संसदको संयुक्त बैठकमा आगामी आर्थिक वर्ष २०७७/०७८ को बजेट प्रस्तुत गर्दैछ। बजेटमा देशभर निर्माण भइरहेका र नयाँ निर्माण हुने विमानस्थलहरूलाई प्रमुख प्राथमिकतामा राखिएको अर्थ मन्त्रालय स्रोतले बताएको छ।
मन्त्रालयका स्रोतका अनुसार सबैभन्दा पहिलो प्रथाकिमतामा गौतम बुद्ध अन्तर्राष्ट्रिय विमानस्थल परेको छ। यो विमानस्थल आगामी आर्थिक वर्षभित्रै निर्माण सम्पन्न गरी सञ्चालन समेत गर्ने विषय बजेटमा समावेश भएको छ।
यसैगरी पोखरामा निर्माण भइरहेको पोखरा क्षेत्रीय अन्तर्राष्ट्रिय विमानस्थल पनि तोकिएकै समयमा निर्माण सम्पन्न गर्ने र सञ्चालनको तयारीका लागि बजेट विनियोजन हुने भएको छ।
साथै एसियाको 'ट्रान्जिट हब' विमानस्थलका रुपमा निजगढ अन्तर्राष्ट्रिय विमानस्थलको निर्माण आगामी आर्थिक वर्षभित्रै सुरु गर्ने बजेटमा समावेश भएको बताइएको छ। यसका लागि विदेशी लगानीबाट भए पनि गर्ने र विदेशी लगानी सुनिश्चित नभएको अवस्थामा नेपालले आफ्नै लगानीबाट भएपनि विमानस्थल बनाउने गरी बजेटमा उल्लेख गरिएको अर्थ मन्त्रालयल स्रोतको भनाइ छ।
यसैगरी त्रिभुवन अन्तर्राष्ट्रिय विमानस्थलको थप स्तरोन्नतिको काम अगाडि बढाउने विषय पनि बजेटमा समावेश भएको छ। विमानस्थलको विस्तार तथ स्तरोन्नत्तिमा पुनः एसियाली विकास बैंकले लगानी गर्ने भएको छ।
साथै बजेटमा विराटनगर विमास्थलमा टर्मिन भवन निर्माण गर्ने विषय पनि समावेश भएको छ। यसैगरी नेपालगञ्ज विमानस्थलमा सुविधासम्पन्न क्षेत्रीय अन्तर्राष्ट्रिय उडानका लागि समेत सहजता हुनेगरी नयाँ टर्मिनल भवन बनाउने विषय बजेटमा समावेश भएको छ। सातै प्रदेशबाट अन्तरप्रदेश उडान गर्न सकिने गरी विमानस्थलको विस्तार गर्ने विषय पनि बजेटमा समावेश गरिएको छ। यसबाहेक सुर्खेत विमानस्थल विस्तार र दाङमा क्षेत्रीय आन्तरिक विमानस्थल निर्माणको विषय पुनः यस पटक पनि बजेटमा दोहोरिएको छ। यसैगरी पूर्व सञ्चार तथा सूचना प्रविधिमन्त्रीको दबाबमा काभ्रेमा आन्तरिक विमानस्थल निर्माण गर्ने विषय पनि बजेटमा परेको अर्थ मन्त्रालय स्रोतको भनाइ छ।
साथै नेकपा अध्यक्ष पुष्पकमल दाहाल र भरतपुर महानगरपालिकाकी मेयर रेणु दाहालको दबाबमा नेपाल ट्रष्टको जग्गामा आर्मीलाई ब्यारेक बनाउन दिँदै विमानस्थल विस्तार गर्ने विषय पनि बजेटमा समावेश भएको स्रोतको दाबी छ। यस बाहेक नागरिक उड्डयनको क्षेत्रमा नेपाल नागरिक उड्डयन प्राधिकरणलाई विभाजन गरी सेवा प्रदायक र नियमक निकाय अलगअलग गर्ने विषय पनि समावेश भएको छ।
साथै प्राधिकरणले देशभर सञ्चालन गरिरहेको विमानस्थल स्तरोन्नतिको कामलाई निरन्तरता दिने गरी बजेटको व्यवस्था भएको स्रोतको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
