काठमाडौं- नेपाली कांग्रेसले नेपालको संविधानको धारा ९ मा चर्चा गरिएको निशान छाप अनुसूचि ३ संशोधनमा राष्ट्रिय सहमति गर्न केन्द्रीय कमिति बैठक बोलाउने भएको छ। प्रधानमन्त्री केपी शर्मा ओलीले बोलाएको सर्वदलीय बैठकमा बोल्दै कांग्रेस सभापति शेरबहादुर देउवाले दलभित्रै राष्ट्रिय सहमति गर्न बैठकबाटै निर्णय गर्ने बताएका हुन्।
बैठकपछि सञ्चारकर्मीसँग संक्षिप्त कुरा गर्दै कांग्रेस नेता कृष्णप्रसाद सिटौलाले नेपालको कालापानी, लिपुलेक र लिम्पियाधुरालगायतका क्षेत्र नक्सामा जारी गरेको संविधान संशोधनमा राष्ट्रिय एकता कायम गर्न केन्द्रीय समिति बैठक तत्काल बोलाइने बताए। ‘हामीले आफ्ना कुरा स्पष्ट राख्यौं। सरकारले नेपालको कालापानी, लिपुलेक र लिम्यिाधुरालगायतका क्षेत्र आफ्नो नक्सामा जारी गरेकोमा धन्यवाद दियौं।’ सिटौलाले भने, ‘निशान छाप संशोधन गर्न पार्टीमा एक मत बनाउन केन्द्रीय समितिको बैठकबाट सर्वसम्मत निर्णय गराउँछौं।’
राष्ट्रिय एकताको विषयमा नेपाली कांग्रेस सधैं उभिएको बताउँदै संविधान संशोधनमा राष्ट्रिय सहमति कामय गर्ने विषयमा प्रधानमन्त्री ओलीलाई ढुक्क हुन देउवाले आग्रह गरेका थिए। जनता समाजवादी पार्टीका नेताहरूले संविधान संशोधनको विषय प्याकेजमा गर्न आग्रह गरेको बैठकमा सहभागी सिटौलाले बताए। तर, प्रधानमन्त्री ओलीले निशान छाप संशोधन विषयमा मात्रै केन्द्रित हुन आग्रह गरेका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।