काठमाडौँ- स्वास्थ्य तथा जनसंख्या मन्त्रालयले सोमबार बिहान एक विज्ञप्ति प्रकाशन गर्दै देशभर ७२ जना कोरोना संक्रमित थपिएको जानकारी गरायो। यीमध्ये कर्णाली प्रदेशको दैलेखका मात्र ७ जना थिए। यो सँगै कर्णालीमा कोरोना संक्रमित हुनेको संख्या ११ पुगेको छ। यसअघि दैलेखमा नै १ जना र सुर्खेतमा ३ जना संक्रमित भेटिएका थिए।
कर्णाली प्रदेशमा जेठ ९ गतेसम्म १ जना मात्र संक्रमित रहेका थिए। दैलेखका उनी नै कर्णालीका पहिलो संक्रमित भएको पुष्टि भयो। उनी भारतबाट आएका थिए। सोमबार फेला परेका नयाँ संक्रमित ७ जना पनि भारतबाट दैलेख आएका व्यक्तिहुन्। नयाँ पुष्टि भएका नारायण नगरपालिकाका २ जना पुरुष शुक्रबार मात्र जिल्ला भित्रिएका थिए। उनीहरुलाई नगरपालिकाको समन्वयमा भारतबाट दैलेख ल्याइएको थियो। नारायण नगरपालिकामा फेला परेका नयाँ संक्रमित १५ र १८ वर्षीय पुरुष हुन्। डुंगेश्वर गाउँपालिकामा १ जना २५ वर्षीया महिलासमेत गरी ३ जनामा नयाँ संक्रमण फेला पर्यो। संक्रमण फेला परेका पुरुषको उमेर २४ र ३५ वर्षीय पुरुष हुन्। उनीहरु पनि केही समयअघि मात्र भारतबाट डुंगेश्वर आएका खुलेको छ।
कर्णालीमा मात्र सात हजार भित्रिए
कर्णाली प्रदेशका सल्यानदेखि रुकुम पश्चिमसम्म १० जिल्लामा मात्र करिब ७ हजार मानिस लकडाउनपछि भित्रिएको र विभिन्न जिल्लाका स्थानीय तहका क्वारेनटाइनमा राखिएको कर्णाली प्रदेशका सामाजिक विकासमन्त्री दल रावलले बताए। दैलेखमा जिल्लामा मात्र अहिलेसम्म चार हजारभन्दा बढी भारतलगायत अन्य मुलुकबाट दैलेख भित्रिएको मन्त्री रावलको भनाइ छ।
उनीहरुलाई स्थानीय सरकारले क्वारेन्टाइनमा राखेर स्वास्थ्य परीक्षण जारी रहेको उनले बताए। दैलेखका सहायक प्रमुख जिल्ला अधिकारी इन्द्रबहादुर क्षेत्रीका अनुसार आइतबारसम्म जिल्लाभर १ हजार ७ सय ३७ जनामा कारोना परीक्षण गरिएको छ। बाहिरबाट आएर क्वारेन्टाइनमा बसेका पनि राति नै भाग्ने गरेकाले स्थानीय सरकारलाई झनै समस्या बढेको क्षेत्रीको गुनासो छ।
परीक्षण किट अभाव
जिल्ला भित्रिनेको संख्या बढेसँगै अहिले दैलेखमा कोरोना परीक्षण गरिने आरडिटी किटसमेत अभाव भएकोले केन्द्र र संघसँग माग गरिएको मन्त्री रावलले बताए। जेठ ५ गते दैलेख आठबिस नगरपालिका १ का ३५ वर्षीय युवामा पहिलो पटक कोरोना संक्रमण देखिएको थियो। सोमबारसम्म दैलेखका ८ जनामा कोरोनाको पुष्टि भइसकेको छ।
सोमबार भेरी अस्पताल नेपालगन्जमा गरिएको परीक्षणमा दैलेखका एक जना महिलासहित ५ जनामा कोरोना पुष्टि भएको छ। प्रदेश अस्पताल सुर्खेत पशुपंक्षी रोग अन्वेषण प्रयोगशाला गरिएको परीक्षणमा दैलेखकै गुराँस गाउँपालिकाका २ जना पुरुष छन्। चार हजार बढी जिल्ला भित्रिए लकडाउन अवधिभर अहिलेसम्म चार हजारभन्दा बढी भारतलगायत अन्य मुलुकबाट दैलेख भित्रिएका छन्। उनीहरुलाई स्थानीय सरकारले क्वारेन्टाइनमा राखेर स्वास्थ्य परीक्षण जारी रहेको क्षेत्रीले बताए।
भारतबाट फर्केन बढेसँगै गाउँमा तनाव
भारतमा रेल र आन्तरिक हवाई सेवा शुरु भएसगै कर्णालीमा पनि तनाव थपिएको सामाजिक विकासमन्त्री रावलको तर्क छ। कर्णाली प्रदेशका केही जिल्लाका मानिसहरु भारतमा रोजगारीका लागि पुगेका र उनीहरु सिमाबाट छिर्ने क्रम रहेकाले अझै केही समय जोखिम थपिएको उनले बताए। यही जोखिमलाई ध्यानमा राखेर परिक्षण वृद्धि गरेको उनले बताए। स्थानीय तहमा क्वारेनटाइन बढाइएको र अस्पतालहरुलाई तयारी अवस्थामा राखिएको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
