काठमाडौं- प्रधानमन्त्री केपी शर्मा ओलीले छिमेकी मुलुक भारतबाट स्वदेश फर्कने नेपालीहरूको बिनास्वास्थ्य परीक्षण सीमा पार गर्नुपर्ने अवस्थाप्रति आपत्ति जनाएका छन्।
विश्व स्वास्थ्य संगठनको प्रोटोकलअनुरुप घर फर्किनेहरूको सीमा पार गर्नुअघि अनिवार्य परीक्षण हुनुपर्ने भए पनि प्रोटोकलअनुरुप स्वास्थ्य परीक्षणबिना नै नेपालीहरू सीमा पार गरिरहेको अवस्थाप्रति प्रधानमन्त्री ओलीले आपत्ति जनाएका हुन्।
सोमबार देशबासीका नाममा सम्बोधन गर्दै प्रधानमन्त्री ओलीले भने, ‘विश्व स्वास्थ्य संगठनको प्रोटोकलअनुरुप घर फर्किनेहरूको सीमा पार गर्नुअगावै अनिवार्य स्वास्थ्य परीक्षण गर्नुपर्ने व्यवस्था छ। जसले महामारीलाई समुदायस्तरमा फैलनबाट धेरै हदसम्म जोगाउन सक्थ्यो । तर छिमेकी मित्र राष्ट्र भारतबाट अधिकांश घर फर्किनेहरू नियमको पालना र परीक्षणबिना नै अनेक कष्ट झेल्दै ठूलो संख्यामा सीमा पार गरिरहनु भएको छ। परीक्षणको अभावमा महामारी तीव्र गतिमा फैलिनमा यसले पनि योगदान गरिरहेको छ।’
अहिले मुलुक बाहिर रहेका घर फर्कने चाहने नेपालीहरूको संख्या बढेको उनले बताए।
सम्बोधनमार्फत नेपालीहरू ठूलो संख्यामा कार्यरत रहेका गन्तव्य मुलुकका सरकार तथा राष्ट्र प्रमुखसँग गम्भीर संवाद गरिरहेको प्रधानमन्त्री ओलीले जानकारी दिए। संवादका क्रममा अन्य मित्र राष्ट्रहरूले अप्ठ्यारोमा परेका नेपालीहरूलाई सहयोग गर्ने विषयमा निश्चिन्त पारेको प्रधानमन्त्री ओलीको भनाइ छ।
‘यसका अतिरिक्त कोभिड–१९ को विश्वव्यापी संक्रमणको कारणबाट उत्पन्न असहज परिस्थितिमा स्वदेश फर्कनुपर्ने अवस्थामा रहेका नेपालीलाई स्वदेश फर्काउने व्यवस्थासम्बन्धी विस्तृत योजनासहितको आदेश तत्काल जारी गरिनेछ। विश्वका जुनसुकै कुनामा अप्ठ्यारोमा परेका आफ्ना देशबासीहरूलाई सरकारले समयमै उद्धार गर्छ’ उनले भने।
समस्याको प्राथमिकता र देशभित्रको तयारीका बीच सन्तुलन मिलाउँदै यो काम छिट्टै सुरु गरिने प्रधानमन्त्री ओलीको भनाइ छ। सरकार आफ्ना नागरिकप्रति संवेदनशील रहेको र यसमा निश्चिन्त रहन प्रधानमन्त्री ओलीले आग्रह गरे।
प्रधानमन्त्री ओलीले भारतलगायत विभिन्न मुलुकहरूबाबट स्वदेश भित्रिइसकेकाहरूको स्वास्थ्य परीक्षण छिटो गर्न, सामाजिक दूरी कायम गर्न, सुरक्षित ढंगले क्वारेन्टिनमा रहन र अन्य नियमहरूको पालना गर्न जरुरी रहेको बताए। यस काममा आवश्यक सहयोग पुर्याउने थप दायित्व स्थानीय तहको काँधमा आइपरेको प्रधानमन्त्री ओलीले जानकारी दिए।
सम्बोधनका क्रममा प्रधानमन्त्री ओलीले थपे, ‘हामी स्पष्ट हुनुपर्दछ, कोही पनि रहरले मात्र विदेशिएको हुँदैन। कोरोना संक्रमण जो कसैलाई पनि हुनसक्छ। कसैले पनि इच्छाले संक्रमण बोकेर फर्किएको पनि हुँदैन। कसैको पनि बोली र व्यवहारबाट घर फर्किएकाहरूको आत्मसम्मानमा चोट नपुगोस् भन्नेमा सचेत रहन म सबै देशबासीहरूलाई आग्रह गर्दछु।’
घर फर्किएकाहरूलाई आफ्ना कारणले आफ्नो परिवार, छरछिमेक तथा समुदायमा महामारी नफैलियोस् भन्नेमा सतर्क रहन र चिकित्सक तथा प्रशासनको सल्लाहबमोजिम स्वास्थ्यसम्बन्धी अन्य नियमहरूको पालना गर्न अनुरोध गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785812786.png)
-1764146706.png)
