काठमाडौं- द्वन्द्वको समयमा राज्य पक्षबाट हत्या गरिएका बर्दिया राजापुर नगरपालिका– ५ श्रीपुरका वर्षीय अनिलकुमार थारुको १८ वर्षपछि जेठ ७ गते अन्तिम संस्कार गरिएको छ। पीडित परिवारले कुशको शव बनाएर थारू संस्कृतिअनुसार सदगत गरी अन्तिम संस्कार गरेका हुन्।
सशस्त्र द्वन्द्वको समयमा डरत्रास र शव नदेखेका कारणले १८ वर्षसम्म अन्तिम संस्कार नगरेको आमा लहिया थारुले बताइन्। तत्कालीन शाही सेनाको टोलीले गाउँमा हिँडिरहेको अवस्थामा कब्जामा लिएर गोली हानी हत्या गरेको थियो।
छोराको हत्या भएको सुनेको भएपनि लास नदेखेपछि उनीहरुले अन्तिम संस्कार गरेका थिएनन्। तर अब फर्केर आउँछ कि भन्ने आश समाप्त भएकाले अन्तिम संस्कार गरिएको उनले बताए।
अनिललाई माओवादी कार्यकर्ता भएको आरोपमा तत्कालीन शाही सेनाको टोलीले ०५९ पुस १४ गते राजापुर नपा-१० कालाबन्जर गाउँबाट लखेट्दै सोही ठाउँको आनन्दनगरमा कब्जामा लिएर गोली हानी हत्या गरेका थिए। उनको शव सोही ठाउँमा सेनाले आफैंले गाडेर गएका थिए। सशस्त्र द्वन्द्वमा वेपत्ता भएको व्यक्ति फर्केर आउने सम्भावना नभएको र परिवारलाई राहतका लागि मृत्युदर्ता आवश्यक हुने भएपछि अन्तिम संस्कार गरिएको द्वन्द्व पीडित साझा चौतारीका अध्यक्ष भागिराम चौधरीले बताए। परिवारले सत्य तथ्य खोजीका लागि वेपत्ता पारिएका व्यक्तिहरुको आयोगमा उजुरी दिएको उनले बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।