काठमाडौं- चैत ११ गते लकडाउन सुरु भएसँगै बन्द रहेको त्रिभूवन अन्तर्राष्ट्रिय विमानस्थल कसरी संचालन गर्ने भनी विमानस्थल कार्यालयले आवश्यक तयारी गरेको जानकारी दिएको छ।
विमानस्थल कार्यालयले विश्व स्वास्थ्य संगठन र अन्तर्राष्ट्रिय नागरिक उड्डयन संगठन (आईकाओ) ले तोकेका सबै मापदण्ड पूरा गर्ने गरी विमानस्थल संचालन गर्दा अपनाउन पर्ने सावधानीबारे तयारी गरिरहेको छ।
विमानस्थल कार्यालयले गरेको तयारीबारे संस्कृति, पर्यटन तथा नागरिक उड्डयनमन्त्री योगेश भट्टराईले अनुगमन पनि गरेका छन्। उनले शुक्रबार त्रिभुवन विमानस्थलको निरीक्षण गरेका हुन्।
विमानस्थल खुलेपछि कोरोनाको संक्रमण नफैलिने गरी तयार पारिएका संरचनाको उनले अनुगमन गरेका हुन्। सामाजिक दूरी कायम हुने गरी विमानस्थल संचालन गर्न आवश्यक संरचना तयारीबारे छलफल भइरहेको विमानस्थल कार्यालयले जानकारी दिएको छ।
सरकारले जेठ मसान्तसम्म हवाइ सेवा संचालन गर्न बन्द गरेको छ। तर यसपछि पनि तत्कालै हवाई सेवा संचालनमा आउने टुंगो छैन। तर भारतले मे २५ बाट आन्तरिक उडान सुरु गर्ने भएपछि नेपालले पनि उडान सेवा खुला गर्न तयारी थालेको बुझिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
