काठमाडौं- सांसद तथा व्यवसायी विनोद चौधरीले प्रोत्साहनमूलक प्याकेज र पुनर्कर्जाको व्यवस्था नहुने हो भने ८० प्रतिशत बैंक समस्यामा पर्ने बताएका छन्। नेपाल उद्योग परिसंघले गरेको छलफलमा उनले प्रोत्साहनको प्याकेज सरकारले ल्याउनुपर्ने बताए।
उद्योग व्यवसाय धरासायी हुँदा त्यसको प्रत्यक्ष असर बैंकिङ क्षेत्रमा पर्ने चौधरीले बताए। ‘अहिलेको जस्तै ब्याज तथा किस्ता तिर्ने समय सार्दै जाँदा बैंकहरुले आफ्नो नाफा बुक गरिसकेका हुन्छन्। यससँगै बैंकसँग तरलता हुने छैन,' उनले भने, 'वास्तविक नगद प्रवाहको अभाव हुनेछ। यसले लेखाप्रणलीलाई मात्रै व्यवस्थित गर्न सक्ला तर बैंकले आफ्नो प्रस्तुति दिन सक्दैन।’
यस्तै अवस्था रहिरहे विगतमा राष्ट्रिय बाणिज्य बैंक र नेपाल बैंकले भोगेको जस्तै समस्या भविष्यमा अन्य बैंकले भोग्नुपर्ने उनले बताए। राहत प्याकेजमार्फत विभिन्न देशले अर्थतन्त्र उकास्ने प्रयत्न गरेकाले नेपाल सरकार पनि त्यसमा केन्द्रित हुनुपर्ने उल्लेख गरे।
‘नेपालको सन्दर्भमा सीमान्तकृत समुदायको दैनिक जनजीवनलाई सहज बनाउन सहयोग पुर्याकउनु पर्ने अवस्था छ। उनीहरूका साथै व्यापार व्यवसाय गर्नेहरूको अवस्था पनि जटिल बन्दै गैरहेको छ,' उनले भने, 'कसरी हुन्छ उनीहरूका लागि तुरुन्तै राहत प्रदान गर्न केही न केही काम गर्नुपर्ने छ।'
अहिले अर्थतन्त्रलाई कसरी पुनर्जिवित गर्ने वा बचाउने गर्ने विषयमा बहस गर्ने बेला भएको चौधरीले बताए। ‘गएका तीन महिनादेखि हामी यस विषयमा छलफल गरिरहेका छौँ। दिनदिनै जनजीवन कठिन बन्दै गैरहेको छ। अहिले ९५ प्रतिशत व्यापार, व्यवसाय, उपत्पादन क्षेत्र, सेवा सहित निर्माण उद्योगमा चेन इफेक्ट परेको छ,' उनले भने, 'मेरो विचारमा अहिलेको टास्क भनेको जनतालाई सुरक्षित राख्नु हो। जनतालाई सुरक्षित राख्ने कुरा गर्दैगर्दा हाम्रा सम्पूर्ण स्रोत साधन तथा पूर्वाधारहरु त्यतै प्रयोग भैरहेका छन्। तत्कालै यसको समाधान गर्ने हामीसँग उपाय छैन। हामीले तत्कालका लागि दैनिक जनजीवनलाई सञ्चालन गर्नेतर्फ ध्यान दिनुपर्ने छ। अहिले हामीले कसका लागि मद्दत चाहिएको हो उनीहरूका लागि काम गर्नु पर्नेछ।‘
तत्कालका लागि लकडाउनको अर्को कुनै विकल्प नभएको उनले बताए। सामाजिक दूरी कायम गर्दै व्यवसाय सञ्चालन खुकुलो बनाउनुपर्ने उनले उल्लेख गरे। रेमिट्यान्सबाटै अर्थव्यवस्था चलेको भन्दै उनले विदेशिएका नेपालीलाई सुरक्षित व्यवस्थाका साथ स्वदेश फर्काउनुपर्ने पनि बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
