फाइल तस्बिर
काठमाडौं– पोखरामा निर्माण भइरहेको पोखरा क्षेत्रीय अन्तर्राष्ट्रिय विमानस्थलमा भारतीय सिमेन्टको विकल्पमा नेपाली सिमेन्ट प्रयोग गर्न थालिएको छ। लकडाउनका कारण भारतीय सिमेन्ट आउन नसकेपछि विमानस्थल निर्माणको काम गरिहरको चिनियाँ कम्पनीले नेपाली सिमेन्ट प्रयोग गरेको हो।
विमानस्थल आयोजनाका प्रमुख विनेश मुनाकर्मीका अनुसार विमानस्थलको निर्माण कार्यमा केही दिनदेखि नेपाली सिमेन्ट सिमेन्ट प्रयोग भइरहेको छ। तर, विमानस्थल निर्माण गरिरहेको चिनियाँ कम्पनीले रन-वे, पार्किङ-वे तथा भवनको मुख्य संरचनामा भने भारतीय ५३ ग्रेडको सिमेन्ट नै प्रयोग गरेको थियो।
‘निर्माण सुरु भएदेखि नै निर्माण कम्पनीले भारतीय सिमेन्ट नै प्रयोग गरेको थियो,’ उनले भने, ‘भारतीय सिमेन्ट आउन नसकेपनि आयोजना कार्यालयको स्वीकृतमा नै नेपाली सिमेन्ट प्रयोग भएको छ। पहिलो ७ दिनको रिजल्ट हामीले तोकेको मापदण्डभित्रै रहेको र अहिले २८ दिनको रिजल्ट आउने क्रममा रहेको छ।’
नेपाली सिमेन्टको प्रयोगसँगै कार्यालयले सिमेन्टको विषयमा परीक्षणको दायरा समेत बढाएको मुनाकर्मीले बताए। उनका अनुसार अहिले पहिले नै निर्माण भएको भवनको संरचनमा प्लाष्टर गर्नेदेखि मार्वल राख्ने, टायल हाल्ने काम भइरहेको छ। साथै झ्यालहरुमा सिसा हाल्ने काम पनि भइरहेको उनले नेपाल लाइभसँग बताए।
‘लकडाउन अगाडि नै आएको उपकरण जडानदेखि फिनिसिङको काम भइरहेको छ,’ उनले भने, ‘कतिपय उपकरण भने भारतको कलकत्ता, चीनको केरुङमा रोकिएको छ। उक्त सामान र प्राविधिकहरू समेत आउन नसक्दा केही उपकरण जडानमा केही समस्या आएको छ।’
विमानस्थल निर्माणमा अहिले ढल र पानीको पाइपहरू फिटिङको काम पनि भइरहेको छ। तर, पाइप फिटिङका लागि आवश्यक नट बुल्ट भने समस्या रहेको उनले जानकारी दिए। कतिपय पाइप लाइनमा नै रोकिएका कारण चिनियाँ निर्माण कम्पनीले नेपाली पाइप जडान गर्न अनुमति मागेको थियो। तर, सम्झौतामा एकै थरीको मात्रै पाइप जडान गर्नुपर्ने भनेर उल्लेख भएका कारण नेपाली पाइप भने जडान गर्न नदिएका मुनाकर्मीले जानकारी दिए।
‘लकडाउनसँगै घर गएका नेपाली कामदार काममा नफर्कंदा समेत काममा असर परको छ,’ उनले भने, ‘तर, काम नै ठप्प हुने अवस्था भने छैनन्।’ निर्माणमा अहिले पनि २ सय ५० चिनियाँ कामदार र ९० जनाको हाराहारीमा नेपाली रहेका छन्। विमानस्थल निर्माणको सबैभन्दा गाह्रो काम सकिसकेको छ।
विमानस्थलको निर्माणमा ५५ प्रतिशत काम पूरा भएको बताइएको छ। विमानस्थल आयोजना कार्यालयका अनुसार रन–वे निर्माण, जहाज पार्किङ-वेलगायत १४ वटै भवनको निर्माण भइरहेको छ।
फिनिसिङ र उपकरण जडानको काममा बढी जोड दिइएको मुनाकर्मीले बताए। सरकारले सन् २०२१ को जुलाईभित्रै निर्माण सम्पन्न गरी विमानस्थल सञ्चालनको तयारी गर्ने योजना अगाडि सारेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786197167.png)
-1764146706.png)
-1786184812.png)
