काठमाडौं- कोरोना भाइरस (कोभिड १९) को माहामारी नियन्त्रण गर्न लगाइएको लकडाउनलाई मौका छोपेर काठमाडौं उपत्यकामा श्रृंखलाबद्ध चोरीका घटना भएका थिए। लकडाउनको सुरुवाती दिनमा अपराधशून्य जस्तै भए पनि पछिल्लो दिनहरुमा भने चोरी बढ्न थालेपछि महानगरीय प्रहरी कार्यलयले आफू मातहतको परिसर, महाशाखा लगायतलाई चोरी नियन्त्रणमा समेत प्रहरी परिचालन गर्न निर्देशन दिएको थियो।
दैनिकजसो चोरीको गुनासो प्रहरीमा कहाँ आउन थालेपछि महानगरीय प्रहरी अपराध महाशाखाको चोरी पिलरले समेत विशेष निगरानी गरेर अपरेशन चलाएपछि चोरी कार्यमा संलग्न भएका दुई युवा पक्राउ परेका छन्।
महाशाखाका अनुसार पक्राउ पर्नेमा सुनसरीको इटहरी उपमहानगरपालिका १४ घर भई काठमाडौं धुम्बाराही बस्ने २१ वर्षीय आश्रय रिजाल (हम्मे) भनिने हिमाल रसाइली र बाराको फुलबारी गाउँपालिका ३ घर भई काठमाडौं ओमबाहल बस्ने २८ वर्षीय अलि आलम मिया छन्।
उनीहरुलाई महाशाखा र महानगरीय प्रहरी वृत्त गौशालाको संयुक्त प्रहरी टोलीले मंगलबार चाबहिलस्थित भत्केको पुलबाट पक्राउ गरिएको हो। उनीहरु नक्कली पत्रकार बनेर चोरी गरेको प्रहरीले जनाएको छ।
उनीहरुले गत चैत ३ गते सिनामंगलस्थित अरेर ५१ ब्वाइज होस्टलबाट ४ थान ल्यापट, चैत २४ गते दिउँसो चावहिल भत्केको पुलस्थित सुबिन मानन्धरको घरबाट एप्पलको म्याकबुक ल्यापटप, एप्पलको आइप्याड, चोरी गरेका थिए।
चोरी भएको जानकारी आएपछि सिसीटिभी फुटेजलाई आधार मानेर अनुसन्धान गर्दा एभेन्जर मोटरसाइकल चोरीमा संलग्न भएको देखिएपछि प्रहरीले त्यसैलाई आधार मानेर अनुसन्धान अघि बढाएको थियो। सोही क्रममा मंगलबार भत्केको पुलमा सोही हुलिया भएको मोटरसाइकल देखिएपछि सादा पोशाकका प्रहरीले रोकर सोधपुछ गर्दा उनीहरुले एपी वान टेलिभिजको प्रेसकार्ड देखाई आफूहरु पत्रकार भएको समेत दाबी गरेका थिए।
प्रहरीले उनीहरुको झोला खानतलासी गर्दा एप्पल कम्पनीको ल्यापटप १ थान, एप्पल कम्पनीको आइप्याड १ थान, विभिन्न ब्राण्डका ६ थान मोबाइल, क्यानोनको क्यामेरा १ थान, नगद ५३ हजार, अमेरिकन डलर ३ सय, चाइनिज युयान २ सय र धारिलो हतियार ३ थान, प्रोजक्टर २ थान, एपी वान टेलिभिजनको प्रेसकार्ड फेला पारेको थियो।
त्यस्तै उनीहरुले चलाएको बा २७ प ९४९० नम्बरको एभेन्जर मोटरसाइकल समेत प्रहरीले बरामद गरेको छ। पक्राउ परेका उनीहरुलाई महानगरीय प्रहरी वृत्त गौशालमा राखेर अनुसन्धान सुरु गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
