काठमाडौं– भैरहवामा निर्माण भइरहेको गौतम बुद्ध अन्तर्राष्ट्रिय विमानस्थल निर्माणको काम रोकिने अवस्थामा आइपुगेको छ।
‘सरकारले चैत ११ गतेबाट लक डाउन गरे पनि निर्माणको काम भइरहेको थियो’, आयोजना प्रमुख इन्जिनियर प्रवेश अधिकारीले भने, ‘वैशाख अन्तिमदेखि निर्माण सामाग्रीको अभाव सुरु भएको छ।’
विशेषगरी नदिजन्य निर्माण सामाग्रीको चरम अभाव हुने अवस्था आएको उनको भनाइ छ। कतिपय निर्माण सामान पाए पनि ढुवानीमा समस्या भएको उनले नेपाल लाइभसँग बताए। निर्माण सामान अभावसँगै ढुवानी सहजताका लागि जिल्ला प्रमुखसँग वार्तालाप भइरहेको उनको भनाई छ।
‘जिल्ला प्रशासन कार्यालयले निर्माण सामाग्री ढुवानीका लागि सहजता गरिदिने प्रतिबद्धता गरेको छ,’ उनले भने, ‘प्रतिबद्धता भएको एक साता भइसक्दा पनि निर्माण सामान ढुवानीका लागि अनुमति भने पाउन सकेका छैनौं।’
अहिले इँटा, सिमेन्ट जस्ता निर्माण जन्य सामाग्रीको ढुवानीमा सबैभन्दा बढी समस्या भएको अधिकारी बताउँछन्।
यसबाहेक पनि जेठ मसान्त सम्ममा नदिजन्य सामान संकलन गर्न नसकेको अवस्था विमानस्थलको निर्माण कार्यमै असर गर्ने उनको भनाइ छ।
‘विमानस्थलको निर्माणमा आइसीबी १ अन्तर्गतको कामकै लागि अझै ७० हजार घनमिटरभन्दा बढी नदिजन्य सामान आवश्यक पर्छ। अहिल पुरानो स्टक पनि सकिएको छ। जेठ मसान्त सम्ममा नदिजन्य सामान ल्याउन नसकेको अवस्थामा विमानस्थल निर्माणका लागि आवश्यक नदिजन्य निर्माण सामान फागुनसम्म ल्याउन सक्ने अवस्था रहँदैन,’ अधिकारीले भने।
नदिजन्य निर्माण सामानकै अभावमा विमानस्थल निर्माणको काम पर धकेलिने अवस्था आउने उनको भनाइ छ।
अहिले विमानस्थल निर्माणमा १ सय ५० जना कामदारले काम गरिरहेका छन्। विमानस्थल निर्माणमा ९० प्रतिशतभन्दा बढी काम भइसकेको छ। निर्माण कम्पनीले अहिले मुख्य टर्मिनल भवनमा फिनिसिङको काम गरिरहेको भने लकडाउन अगाडि नै आएको उपकरण जडानको काम पनि भइरहेको उनको भनाइ छ। तर, केही उपकरण भने अझै नआइपुगेको अधिकारी बताउँछन्।
सरकारले भने चालु आर्थिक वर्षमै विमानस्थलको निर्माण सम्पन्न गरी सञ्चालन गर्ने घोषणा गत वर्षको बजेट भाषणमै गरेको थियो। तर, विमानस्थल निर्माणमा कोरोनाका असर परे पनि सरकारले आगामी आर्थिक वर्षभित्र विमानस्थल सञ्चालन गर्ने तयारी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
