काठमाडौं- राष्ट्रिय मानव अधिकार आयोगले देशभर सञ्चालनमा रहेका क्वारेन्टाइनहरुको मापदण्डका विषयमा सरकारको ध्यानाकर्षण गराएको छ। आयोगले एक विज्ञप्ति जारी गर्दै क्वारेन्टाइनमा बसेको एक व्यक्तिको मृत्यु भएको घटनाप्रति सरकारलाई सजग गराउँदै तत्काल सबैलाई आवश्यक मापदण्डअनुसार पुर्याउन निर्देशन दिएको छ।
बाँकेमा आइतबार एक जनाको क्वारेन्टाइनमा रहेको अवस्थामा मृत्यु भएपछि आयोगले क्वारेनटाइनहरुको मापदण्डमाथि प्रश्न उठाएको हो।
विश्व स्वास्थ संगठनको क्वारेन्टाइन व्यवस्थापन मापदण्डअनुसार क्वारेन्टाइनमा उपयुक्त र पर्याप्त खाना, पानी र सरसफाइको प्रबन्ध हुनुपर्ने, संक्रमण रोकथाम तथा नियन्त्रणका न्यूनतम उपायहरुको कार्यान्वयन गर्नुपर्ने आयोगको विज्ञप्तिमा भनिएको छ। क्वारेन्टाइनमा रहेका व्यक्तिहरुको स्वास्थ्य अवस्थाको अनुगमन तथा न्यूनतम आवश्यकता पूर्तिको सुनिश्चितता गर्नुपर्ने, क्वारेन्टाइनमा रहेका व्यक्तिहरुलाई सम्भव भएसम्म पर्याप्त रुपमा हावा चल्ने खालको एकल कोठा उपलब्ध गराउनुपर्ने आयोगको विज्ञप्तिमा उल्लेख छ।
क्वारेन्टाइनमा रहेका व्यक्तिहरुबीचमा समेत शारीरिक दूरी कायम हुनुपर्ने, क्वारेन्टाइनमा रहेका व्यक्तिहरुलाई बाहिर रहेका परिवारका सदस्यहरुसँग कुराकानी र सञ्चार गर्ने प्रबन्ध मिलाउनुपर्ने, यथासम्भव इन्टरनेट, समाचार तथा मनोरञ्जनको व्यवस्था मिलाउनुपर्ने भनिएको छ। मनोसामाजिक सहायता उपलब्ध गराउनुपर्ने र बालबालिका, अपाङ्गता भएका व्यक्ति तथा जेष्ठ नागरिकलाई विशेष ध्यान दिनुपर्नेलगायतका व्यवस्था हुनुपर्ने आयोगको विज्ञप्तिमा उल्लेख छ।
आयोगको अनुगमनको क्रममा मापदण्डअनुरुप क्वारेन्टाइनहरुमा पर्याप्त पोषणयुक्त खाना, पिउने पानी, शौचालय, उचित बसोबास, स्वास्थ्य हेरचाहजस्ता आवश्यकताहरु समेतको उचित व्यवस्थापन नपाइएको आयोगले जनाएको छ। जसका कारण व्यक्तिका आधारभूत मानव अधिकार सङकुचनमा परेको आयोगले जनाएको छ।
क्वारेन्टाइनहरु व्यवस्थित हुन नसक्दा सम्भावित सङक्रमितहरु क्वारेन्टाइनमा बस्न नचाहने र बसिरहेकाहरु पनि सुरक्षाकर्मी र स्वास्थ्यकर्मीको आँखा छली उम्किने, भाग्ने गर्दा समाजमा सङक्रामक रोग अझ बढी फैलिने सम्भावना रहेको आयोगले जनाएको छ।
कोभिड–१९ का कारणबाट मृत्यु हुने प्रत्येक परिवारलाई उचित राहत उपलब्ध गराउने व्यवस्था मिलाउन आयोग नेपाल सरकारलाई आग्रह गरेको छ।
कोभिड–१९को रोकथाम, उपचार तथा नियन्त्रणमा दिनरात खटिएका चिकित्सक, नर्स, सफाइ कर्मचारीहरु, सुरक्षाकर्मी, एम्बुलेन्स चालक, शव व्यवस्थापनकार्यमा संलग्न स्वयंसेवक तथा सञ्चारकर्मीहरुलाई आयोगले धन्यवाद दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
.jpg)
-1763721444.png)
