प्रतीकात्मक तस्बिर
काठमाडौं- सरकारले आगामी आर्थिक वर्षमा पनि रेल र पानी जहाजको योजना सार्वजनिक गरेको छ। गत वर्षको नीति तथा कार्यक्रममा सरकारले मित्रराष्ट्र चीन र भारतसँगको सहकार्यमा दुवै छिमेकी मुलुकहरु जोड्ने रेलमार्ग निर्माणको लागि प्रावधिक अध्ययन सम्पन्न गर्ने भनिएको थियो।
पूर्व पश्चिममा विद्युतीय रेलमार्ग निर्माण सुरु गरिने गतवर्षको नीति तथा कार्यक्रमा भनिएको थियो। गत वर्षको नीति तथा कार्यक्रमको ८३ औं बुँदामा वीरगञ्ज–काठमाडौं र रसुवागढी–काठमाडौं रेलमार्गको विस्तृत परियोजना प्रतिवेदन तयार गरी दुई वर्षभित्र निर्माण सुरु गरिने उल्लेख थियो। यो वर्षको नीति तथा कार्यक्रममा वीरगञ्ज–काठमाडौं र रसुवागढी–काठमाडौं रेलमार्ग निर्माणको प्रारम्भिक काम सुरु गर्ने घोषणा गर्ने भनिएको छ।
शुक्रबार सरकारको तर्फबाट राष्ट्रपति विद्यादेवी भण्डारीले संघीय संसदको संयुक्त बैठकमा आगामी आर्थिक वर्ष २०७७/७८को नीति तथा कार्यक्रम प्रस्तुत गर्दै प्रारम्भिक अध्ययन प्रतिवेदनप्राप्त भइसकेकाले अब निर्माणको प्रारम्भिक काम सुरु गर्ने उल्लेख छ।
नीति तथा कार्यक्रममा पूर्वापश्चिम रेलमार्गको काँकडभिट्टा–इनरुवा–खण्डको निर्माणको पनि काम प्रारम्भ गर्ने उल्लेख छ। पूर्व–पश्चिम रेलमार्गको एउटा बाहेक सबै खण्डको विस्तृत परियोजना प्रतिवेदन तयार भइसकेको नीति तथा कार्यक्रममा उल्लेख छ।
त्यस्तै सरकारले जलमार्गको योजना यो वर्षपनि राखेको छ। गत वर्ष बुँदा नम्बर ८५मा यो कुरा राखिएको थियो। गत वर्ष नेपालीको आफ्नै पानीजहाजमा यात्रा गर्ने चाहाना छिट्टै पुरा हुने अवस्थामा पुगेको भनिएको थियो। पानी जहाज कार्यालय स्थापना गरी सञ्चालनको कानुनीलगायत तयारी गर्ने भनिएको थियो।
योअनुसार हाल पानी जहाज कार्यालय भने सञ्चालन रहेको छ। कोशी, कर्णाली र गण्डकी नदीमा जल यातायातको विकास गरी त्यसलाई भारतीय जलमार्गसँग जोडिने भएको छ। आगामी आर्थिक वर्षको नीति तथा कार्यक्रममा सरकारले यस्तो घोषणा गरेको हो।
यो वर्षको नीति तथा कार्यक्रममा गण्डकी नदीको उपयुक्त स्थानमा टर्मिनल बनाएर भारतीय जल यातायात सञ्जालसँग जोड्ने भनिएको छ। तीन वर्षभित्र जल यातायात सञ्चालनको घोषणा समेत सरकारले गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
