काठमाडौं– श्रम, रोजगार तथा सामाजिक सुरक्षा मन्त्रालयमा केन्द्रीय श्रम सल्लाहकार परिषदको छैठौं बैठक सकिएको छ। श्रममन्त्री रामेश्वर राय यादवको संयोजकत्वमा बसेको उक्त बैठकमा कोरोना भाइरसका कारण उद्यम व्यवसाय र रोजगारीका क्षेत्रमा परेको प्रभाव र न्यूनीकरणका सम्बन्धमा छलफल भएको छ।
त्यस्तै राहत, छुट तथा उद्यम व्यवसाय सञ्चालनमा आवश्यक पर्ने सुविधा वितरणलगायतका विषयमा सरकारले गरेका निर्णय कार्यान्वयनमा जोड दिएको श्रम मन्त्रालयका सहसचिव एवं प्रवक्ता सुमन घिमिरेले जानकारी दिए।
सरकारको निर्णय कार्यान्वयनमा समस्या देखिएमा व्यवहारिक समस्या समधानका लागि श्रम तथा व्यवसायजन्य सुरक्षा विभागको भूमिकाको प्रभावकारीताका सम्बन्धमा छलफल केन्द्रित थियो।
छलफलले श्रमिकहरुका सेवासुविधा र रोजगारीको हकलाई सुनिश्चित गराउनुका साथै रोजगारदाता र श्रमिकबीच असल श्रम सम्बन्ध कायम गरिनुपर्नेमा जोड दिइएको थियो। त्यस्तै कोरोना भाइरसले उद्योग व्यवसायमा पारेको प्रभाव न्यूनीकरण गरी व्यवसाय टिकाउने सम्बन्धमा समेत जोड दिइएको छ।
बैठकले सरकार, रोजगारदाता, श्रमिक तथा सम्बन्धित सबै सरोकारवालाहरु एकसाथ हिँडेर महामारीलाई सामना गर्ने निष्कर्ष निकालेको छ।
आइतबार सम्पन्न केन्द्रीय श्रम सल्लाहकार परिषदको बैठकमा विभिन्न मन्त्रालयका सचिवहरु, रोजगारदाता र ट्रेड युनियनका पदाधिकारीहरुको उपस्थिति थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
