काठमाडौं- ब्राजिलियन स्टार फिलिप कोउटिन्होका लागि समय निकै कठीन बनिरहेको छ। बार्सिलोनामा उनको भविष्य अनिश्चित बनिरहँदा बायर्न म्युनिखले नै केही प्रस्ताव गर्ला या कुरा आइरहेका प्रिमियर लिग क्लबमा बेचिएलान् यकिन छैन।
जर्मन क्लब बायर्न म्युनिखमा बार्सिलोनाबाट लोनमा गएका कोउटिन्हो यो सिजनको अन्त्यसँगै क्याम्प नाउ फर्किंदै छन्। गएको सिजन लोनमा गएका कोउटिन्होलाई बायर्नले १२० मिलियन युरो मा राख्न नसक्ने प्रतिक्रिया दिइरहेको छ। जसले गर्दा उनी बार्सिलोना फर्किने निश्चित जस्तो छ।
यसले कोउटिन्होको ब्यवस्थापन कसरी गर्ने भन्ने विषय बार्सिलोनाका लागि समस्या जस्तो भइरहेको छ। हुन पनि सन् २०१८ मा इंग्लिस क्लब लिभरपुलबाट १४२ मिलियन पाउण्डमा स्पेनिस क्लब बार्सिलोना गएका कोउटिन्होको प्रदर्शन सोचे जस्तो भएन। जसले गर्दा उनीमाथि थुप्रै प्रश्नहरु तेर्सिए।
आफ्नै स्तरको पनि प्रदर्शन गर्न नसक्दा कोउटिन्हो बार्सिलोनाको बेन्चमा निकै खेल बसे। त्यसबाहेक पनि उनलाई फिटनेस र चोटले पनि सतायो।
बायर्नले कोउटिन्होलाई राख्न नचाएको अर्को पाटो कारोना भाइरस (कोभिड–१९) पनि एक हो। कोरोना भाइरसबाट फुटबलमा ठूलो आर्थिक संकट परेको छ। कतिपय क्लबले खेलाडीलाई तलब समेत दिन नसकेको तीतो यथार्थ छ। यस्तो समयमा बायर्नले ठूलो मूल्यमा कोउटिन्होलाई आफ्नो क्लबमा निरन्तरता दिन नसक्ने जनाउनु स्वभाविक हो।
बार्सिलोना अझै पनि रकम घटाएर उनलाई ८० मिलियन युरोमा बेच्ने विचार गरिरहेकै छ। तर अहिलेसम्म ठोस प्रस्ताव गर्ने गरी अगाडि कुनै क्लब देखिएका छैनन्।
बार्सिलोनाका प्रशिक्षक क्विके सेटियनलाई सेन्टर मिडफिल्डबाट आउने सिजनमा कोउटिन्होलाई खेलाउन बार्सिलोनाका पूर्वप्रशिक्षक एर्नेस्टो भालभर्देले सुझाव दिएका थिए। भालभर्देको प्रशिक्षणमा कोउटिन्होले विंगरको भूमिकामा राम्रो प्रदर्शन गर्न सकेका थिएनन्। त्यसैले उनको खेल सेन्टर मिडफिल्डमा राम्रो हुने भालभर्देको तर्क छ।
तर बार्सिलोनालाई अर्को समस्या पनि छ, कोउटिन्होलाई राख्दा एक सिजनमा ३० मिलियन युरो भन्दा बढी तिर्नु पर्छ। लयमा नरहेका कोउटिन्होलाई ठूलो राशीमा रकम तिर्नु बार्सिलोनाले एक हिसाबले बालुवामा पानी खन्याउनु सरह सम्झेको हुनुपर्छ।
बार्सिलोनाबाट ७६ खेल खेलेका कोउटिन्हो २०१८ मा ५ वर्षका लागि अनुबन्धित भएका थिए। तर सोचेको जस्तो हुन सकेन। कोउटिन्होको खेल जीवनमा सफल क्लब लिभरपुल रह्यो। उनी सन् २०१३ मा लिभरपुलमा ८.५ मिलियन पाउण्डमा इटालियन क्लब इन्टर मिलानबाट गएका थिए।
२०० मिलियन पाउण्डमा फ्रेन्च क्लब पेरिस सेन्ट जर्मेनमा नेयमार बेचेको बार्सिलोनाले उनकै स्थान लिनसक्ने खेलाडीका रुपमा लिभरपुलमा राम्रो प्रदर्शन गरिरहेका कोउटिन्होलाई पाँच वर्षका लागि भित्र्याएको थियो। तर बार्सिलोनाको लागि उही कोउटिन्हो अहिले टाउको दुःखाइको विषय बनेको छ।
अहिले कुनै क्लबले कोउटिन्हो किन्ने रुची नदेखाए पनि उनलाई अरु कुनै क्लबमा लोनमा पठाउने गरी बार्सिलोना अघि बढ्ने देखिन्छ। जसबाट लोनमार्फत १३ मिलियन युरोको कमाइसमेत हुनेछ।
तर बार्सिलोनामा नै कोउटिन्हो फर्किएमा उनको समय यसअघिको जस्तो खराब नै रहला भन्ने यकिन गर्नु पनि उनीमाथिको अन्याय हुनेछ। हुन पनि सम्भावना र कला भएका खेलाडी हुन् कोउटिन्हो। मिडफिल्डदेखि अट्याकसम्म अब्बल उनलाई कुन शैलीमा प्रयोग गरिन्छ भन्नेले नै उनको खेल कस्तो हुनेछ भन्ने देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775812183.jpg)
-1764146706.png)
