काठमाडौं- रियल मड्रिडका विंगर लुकास भासकेसले अहिलेको परिस्थितिमा केही समय भए पनि शान्ती पाउन फुटबल सुरु भए सहज हुने बताएका छन्। कोरोना भाइरस (कोभिड १९) को पीडाबाट बाहिर निस्कन फुटबलले सघाउन सक्ने उनको भनाइ छ।
२८ वर्षका भासकेस बन्द रंगशालामा नै भए पनि फुटबल सुरु गर्दा घरमा बसेर हेर्नेहरुलाई पनि सहयोग पुग्नेमा देखिन्छन्। ‘पहिलो कुरा त सबै काम सुरक्षित रुपमा गर्नुपर्ने हुन्छ, सुरक्षाका उपाय अपनाएर यदि हामी खेल्न सक्यौँ भने त्यसले समाज र मानिसहरुलाई सहयोग नै गर्नेछ’ गार्जियनसँग उनले भनेका छन्।
ला लिगामा अहिलेसम्म २७ खेल सकिँदा ५८ अंकसहित बार्सिलोना शीर्ष स्थानमा छ। दोस्रोमा रहेको रियल मड्रिडको ५६ अंक छ। अहिले स्थगित रहेको खेल कहिले हुने भन्ने यकिन छैन। २८ मे बाट खेलहरु गर्न सकिने बारे छलफल भए पनि अहिले नै केही भन्न सकिने स्थिति छैन।
रियल मड्रिडले अब अर्को हप्ताबाट अभ्यास सुरु गर्ने भएको छ। पहिलो चरणमा व्यक्तिगत रुपमा गरिने अभ्यासलाई परिस्थिति अनुसार सामूहिक रुपमा लगिने क्लबले जनाएको छ।
प्रशिक्षक जिनेदिने जिदानले कम खेलाडीहरु राखेर नै प्रशिक्षण गराउने र आवश्यकताअनुसार प्रशिक्षण शैली फेर्ने योजना बनाइरहेका छन्। आउँदो हप्तादेखि नै ला लिगाका खेलाडीहरुमा कोरोना परीक्षण गर्ने तयारी पनि भइरहेको छ।
ला लिगाका खेलाडीहरुले आउँदो सोमबारदेखि खेल अभ्यास गर्न पाउने गरी स्पेनका प्रधानमन्त्री पेड्रो सान्चेजले अनुमति दिएका थिए। कोरोना भाइरस (कोभिड १९) का कारण आइपरेको परिस्थिति सुधार गर्न विस्तारै अघि बढ्ने योजना सुनाएसँगै खेलाडीहरु अभ्यासमा सामेल हुन पाउने भएका हुन्।
‘व्यावसायिक खेलाडीहरुले व्यक्तिगत रुपमा मे ४ देखि अभ्यास गर्न सक्नेछन्। खेल क्षेत्रमा सबै सुरक्षाका उपायहरु अपनाएर विस्तारै अघि बढ्ने वातावरण बनाइनेछ’ उनले भनेका छन्। उनले अर्को चरणमा ५० जनासम्म एकै ठाउँमा रहन पाउने गरी काम गर्ने र तेस्रो चरणमा अझ सहज बनाइने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
