काठमाडौं- स्पेनिस क्लब रियल मड्रिडका ब्राजिलियन स्टार खेलाडी मार्सेलो गएको दुई वर्षयता कठीन परिस्थितिमै गुज्रिरहेका छन्। न त उनको प्रदर्शन नै पहिलेको जस्तो देखिन्छ न त पहिले जस्तो तन्दुरुस्त नै छन्।
त्यहीमाथि गएको महिना फेरि उनमा फिटनेस समस्या देखिएको छ। एकपछि अर्को समस्याबाट गुज्रिएपछि उनी रियल मड्रिडमै रहने विषयमा प्रश्न उठ्न थालेका छन्। मार्सेलो पुरानै लयमा फर्किन नसके बेन्चमै भए पनि राखिराख्न प्रशिक्षक जिनेदिन जिदान उपयुक्त देख्दैनन्।
मार्सेलोको मांशपेसीमा लागेको चोट निको हुन अझै समय लाग्छ। अहिले कोरोना भाइरस कोभिड-१९) ले आराम गर्ने समय पाएकाले मार्सेलोलाई केही राहत भने दिएको छ। यो समयमा सबै प्रतियोगितादेखि अभ्यासहरु बन्द भएको हुँदा मार्सेलोले आफूलाई निको बनाउने समय त पाए। तर उनलाई अझै पनि फिटनेसको चिन्ताबाट मुक्त भने छैनन्।
रियल मड्रिडका उत्कृष्ट डिफेन्डर मध्येका एक हुन् मार्सेलो। प्रशिक्षक जिदान पनि उनलाई आफ्नो क्लबमा राख्न नै चाहन्छन् तर आगामी खेलाडी स्थान्तरणको समयसम्म मार्सेलोको सुधार कस्तो रहन्छ त्यसमा भर पर्नेछ।
हुन त ३१ वर्षीय मार्सेलोको सम्झौता रियल मड्रिडमा २०२२ को जुन महिनासम्म छ।
मार्सेलो कस्ता खेलाडी हुन् त्यो उनले रियलमा गएर आफ्ना खेल कौशल देखाइसकेका छन्। उनी रियल मड्रिडमा गएपछि क्लबले चार पटक च्याम्पियन्स लिगको उपाधि जितेको छ।
सन् २००७ रियल मड्रिड गएका मार्सेलो आफ्नो व्यावसायिक फुटबल यात्रा रियल मड्रिडमै बिसाउन चाहन्छन्। तर खेलाडीले जति खेल्न सक्यो त्यही बेलासम्म मात्रै क्लबले राख्ने विश्वव्यापी चलन हुँदै हो।
मार्सेलोले केही दिनअघि मात्रै भनेका थिए, ‘म रियल मड्रिड छोड्न चाहन्न।’
इटालीका तथा रियल मड्रिडका पूर्व खेलाडी समेत रहेका फाबियो कानभारोसँग इन्स्टाग्राम च्याटमा मार्सेलोले भनेका छन्, ‘म रियल मड्रिड छोड्न चाहन्न र मलाई लाग्दैन कि रियलले मलाई बेच्छ।’
मार्सेलो रियलमा आएदेखि नै खुशी छन्। सन्तुष्ट पनि। उनका कुरा र अभिव्यक्तिबाट त्यो प्रष्ट हुन्छ।
‘राम्रो लाग्छ, अन्य टिमले मलाई रुची देखाएकोमा। तर युभेन्टसको बारेमा मलाई थाहा छैन। मैले दुई वर्षअघि सम्झौता गरेको थिएँ। सर्त थियो कि क्रिस्टियानो रोनाल्डोबिना क्लबमा रहन सक्दिन’, उनले भनेका छन्।
तर अहिले रियलमा ब्राजिलियन युवा खेलाडी रोड्रिगो र भिनिसियस तथा बेल्जियमका इडेन हजार्ड आएपछि राम्रो भएको मार्सेलो बताउँछन्।
कप्तान सर्जियो रामोसपछि रियलमा लामो समयसम्म रहने दोस्रो खेलाडी हुन् मार्सेलो। १३ वर्ष रियलबाट खेलिसकेका मार्सेलो आफ्नो क्लब करियर त्यही बिसाउन चाहन्छन्। तर उनको इच्छाप्रति रियल मड्रिडले के सोच्दो हो?
आगामी खेलाडी स्थान्तरणबाट रियलले धेरै खेलाडी हेरफेर गर्दैछ। प्रशिक्षक जिदानले मार्सेलोका बारेमा धेरै टिप्पणी नगरे पनि ग्यारेथ बेल लगायतका पूराना खेलाडी बेच्ने संकेत यसअघि नै देखाइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1764146706.png)
