काठमाडौं- लकडाउनका कारण विकास निर्माणका काम ठप्प प्रायः रहेका बेला गत फागुनबाट सुरु भएको काठमाडौं उपत्यकाको विद्युत् तार भूमिगत गर्ने योजनामा भने धमाधम काम भइरहेको छ। रत्नपार्क वितरण केन्द्रअन्तर्गतको चुच्चेपाटीदेखि गौशाला चोकसम्मको विद्युत् लाइन भूमिगत गर्ने काम चलिरहेको आयोजना प्रमुख सुमन श्रेष्ठले बताए।
‘यतातिर सडक विभागले खानेपानी र कालोपत्रेलगायतका काम सुरु गर्ने भएका कारण पनि हामीले काम त्योभन्दा पहिल्यै सक्न खोजेका हौं। अहिले सवारी चाप पनि छैन। लकडाउन खुलेपछि सवारी चाप पनि बढ्ने भएकाले त्यो क्षेत्रमा अहिल्यै काम सक्न खोजेका हौं,’ उनले भने।
आयोजनामा भारतीय निर्माण कम्पनी केइआई इन्डस्ट्रिजले काम गरिरहेको छ। चुच्चेपाटीदेखि गौशाला चोकसम्मको करिब २ किलोमिटर क्षेत्रमा विद्युत् तार भूमिगत गर्ने काम भइरहेको हाे। यसका लागि ५० जना कामदार खटिएका छन्। ठेकेदार कम्पनीले १ महिनाभित्र काम सक्ने भने पनि कामदार थपेर त्यो भन्दा पहिल्यै काम सक्ने तयारीमा आफूहरू रहेको श्रेष्ठले बताए।
विद्युत् तार भूमिगतको काम काठमाडौं उपत्यका अरु क्षेत्रमा भने रोकिएको छ। ‘यो क्षेत्रको कामलाई हामीले प्राथमिकता दिनुको कारण के हो भने यहाँ सडक विस्तारको काम पनि तत्काल सुरु हुन लागेको छ। सडक बनाइसकेपछि फेरि हामीले त्यसैमाथि काम गर्न भएन। अर्को भनेको लकडाउन खुलेपछि सवारीसाधन संचालन भइरहेको बेला काम गर्न झन् सकिँदैन,’ श्रेष्ठले भने।
महाराजगञ्ज वितरण केन्द्रअन्तर्गतको विद्युत् लाइन भूमिगतको काम भने अहिले रोकिएको उक्त आयोजना हेरिरहेका प्रमुख अभिषेक अधिकारीले नेपाल लाइभलाई जानकारी दिए।
रत्नपार्क वितरण केन्द्रअन्तर्गत रत्नपार्क, न्यूरोड, अनामनगर, ठमेल, त्रिपुरेश्वर, सिंहदरबार, लाजिम्पाट, एयरपोर्ट, चावहिल जोरपाटीलगायतका क्षेत्रहरू र महाराजगञ्ज वितरण केन्द्रअन्तर्गतका क्षेत्रहरू बालुवाटार, बूढानीलकण्ठ, टोखा, गोंगबू, महाराजगञ्जलगागतका स्थानहरूमा विद्युत् वितरण प्रणाली भूमिगत हुँदैछ। गत फागुन ५ गते प्रधानमन्त्री केपी शर्मा ओलीले उक्त आयोजनाको उद्घाटन गरेका थिए।
.jpg)
.jpg)
.jpg)
.jpg)
.jpg)
.jpg)
.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
