काठमाडौं- स्पेनिस ला लिगामा अन्तिम खेल भएको पनि ४३ दिन पुगिसक्यो। कोरोना भाइरस (कोभिड १९) का कारण रोकिएका खेलका कारण सिजनको बाँकी समय कम हुँदै गइरहेको छ। विश्व जगतमा परिरहेको असरबाट खेल क्षेत्रलाई छुट्याउन नमिल्ने भए पनि खेल गराउन सकिने सम्भावनामा कुराकानी पनि भइरहेका छन्।
ला लिगामा बार्सिलोना र रियल मड्रिडबीच यो सिजन उपाधि भिडन्त रोचक हुने देखिएको थियो। तर कोरोनाका कारण खेल स्थगित भएसँगै त्यो रोमाञ्चकता पनि सकिएको छ। २७ खेल सकिँदा ५८ अंकसहित बार्सिलोना शीर्ष स्थानमा थियो। दोस्रोमा रहेको रियल मड्रिडको ५६ अंक छ।
अहिले स्थगित रहेको खेल कहिले हुने भन्ने यकिन छैन। २८ मे बाट खेलहरु गर्न सकिने बारे छलफल भए पनि अहिले नै केही भन्न सकिने स्थिति छैन। हरेक टिमले ११ खेल खेल्न बाँकी नै छ।
अहिले च्याम्पियन्स लिगसँगै युरोपा लिग फुटबल अर्को सूचना जारी नभएसम्मका लागि स्थगित गर्ने निर्णय भइसकेको अवस्था छ। खेलहरु स्थगित गर्ने निर्णय भएको लामो समय भइसक्दा कोरोना संकटले प्रतियोगिता अनिश्चित बनिरहेको थियो।
अहिले भने २९ अगस्टसम्म बन्द रंगशालामा भए पनि खेल गर्न सकिन्छ कि भन्नेमा युइएफए लागिरहेको छ। त्यसका लागि २३ अप्रिलमा अर्को बैठक हुँदैछ। जसमा इस्तानबुलमा २९ अगस्टमा फाइनल खेल गर्ने गरी अरु खेल अगाडि नै सकाउने योजना बनिरहेको हो।
अहिले युरोपभर जुनसम्मका राष्ट्रिय टिमका खेलहरु पनि स्थगित गर्ने निर्णय भएको छ। युइएफएमा आबद्ध ५५ देशका सदस्यहरुको बैठकले यस्तो निर्णय गरेको हो। इंग्लिस प्रिमियर लिगसहित युरोपका अरु ठूला लिग प्रतियोगिताहरु पनि स्थगित नै छन्।
युइएफएका अध्यक्ष अलेक्जेण्डर सेफेरिनले यसअघि नै जुनसम्म प्रतियोगिताहरु हुन सकेन भने सबै कुरा यत्तिकै सकिन सक्ने बताइसकेका थिए। यदि सिजन यत्तिकै सकाए शीर्षमा रहने टिमलाई भन्दा ठूलो असर रेलिगेसनमा रहेका टिमलाई पर्नेछ। त्योसँगै शीर्षमा पर्ने भिडन्तमा देखिएका टिमलाई पनि यत्तिकै हुने विजेता छनोटले मार पर्ने नै छ।
रियल मड्रिडका खेलाडी, पदाधिकारी र समर्थक पनि अहिलेको परिस्थितिमा यत्तिकै लिग सकाइने हो कि भन्ने चिन्तामा देखिन्छन्। स्पेनिस फुटबल फेडेरेसनले कस्तो निर्णय लिने हो भन्नेमा उनीहरु कुराकानीमा छन्। मे महिनाको अन्तिमसम्म पनि पूरा टिमको एक साथ अभ्यास सम्भव नदेखिएको अहिलेको अवस्थामा अझ पछि के हुने हो भन्न सकिने स्थिति छैन। तर पनि खेलाडीहरु हार जितको निर्णय मैदानबाट नै होस् भन्ने चाहन्छन् नै।
आउँदो हप्ता खेल तालिकाका विषयमा युइएफले निर्णय गर्ने तयारी गरिरहेकाले त्यो समय महत्वपूर्ण हुने देखिन्छ। सम्झौता सकिएका खेलाडीहरु, क्लबको अवस्था र रोकिएका खेलहरुको बारेमा कुराकानी हुने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786197167.png)
-1764146706.png)
-1786184812.png)
