काठमाडौं- चाबहिल- गौशाला र चाबहिल- चुच्चेपाटी सडक स्थानीय तहसँग समन्वय गरेर निर्माण सुचारु भएकाे छ। सडक खण्डकाे धोवीखोला-गौशाला र चाबहिल-चुच्चेपाटी क्षेत्रमा निर्माणको काम सुचारु भएको हो।
पुसदेखि सो सडक खण्डको स्तरोन्नती थालिएकोमा विश्वव्यापी रूपमा फैलिएको कोरोना भाइरसका कारण चैत ११ देखि भएको लकडाउनले निर्माण कार्य रोकिएको थियो। विश्व स्वास्थ्य संगठन र सरकारले तोकेको सुरक्षा मापदण्ड अपनाएर सडक विभागले काम गर्ने भनेपछि भौतिक पूर्वाधार तथा यातायात मन्त्रालयमार्फत् कोरोना रोकथाम सतिमिबाट निर्णय गराई विभागले मातहतका निकायलाई काम सुचारु गर्न भनेको हो।
सोही अनुसार धोवीखोला-गौशाला र चाबहिल-चुच्चेपाटी सडक निर्माणको काम सुचारु भएको हो। उक्त सडक खण्डमा धुलाे र हिलोले स्थानीयदेखि पैदल यात्रुसमेत आक्रान्त थिए।
लकडाउनअघि काठमाडौंका सडकमा ओभरले र मार्किङको काम तीव्र रूपमा भएको थियो। सो सडक पनि निर्माण भइरहेकोमा लकडाउनका कारण रोकियो। सुरक्षित तवरबाट काम गर्दा सबै क्षेत्रलाई फाइदा हुनेभन्दै सडक विभागले काम अघि बढाएको हो। योसँगै सम्भव भएसम्म देशका विभिन्न ठाउँमा रहेका निर्माणाधीन अयोजनाको काम सुचारु भएको विभागले जनाएको छ।
५० वर्षअघि बिच्छाइएका पाइप फुटेर हुने समस्याको समाधानका लागि सरकारले दीर्कालीन उपाय खोजी गरेको हो। कूल २ हजार एक सय मिटरको यो सडकमा पानीका पाइप र सडक व्यवस्थापनको एउटै ठेक्का लगाइएको थियो। सडकको पाइप फेरेर सडक पिच गर्न कालिका कन्स्ट्रक्सन र वेदांशी कन्स्ट्रक्सनले संयुक्त रुपमा ठेक्का पारेका हुन्।
सडक डिभिजन कार्यालय काठमाडौं र कालिक वेदांशी जेभीबीच गत पुस १५ गते ६ महिनाभित्र काम सक्ने गरी सम्झौता गरेको थियो।
२० करोड ८७ लाख ९७ हजार २ सय ६५ रुपैयाँमा ठेक्का पाएको कालिका-वेदांशी जेभीले पुस २२ गतेबाट काम थालेको थियो। तर, चैत दोस्रो सातादेखि लकडाउन भएका कारण काम रोकिएको थियो।
सामान्य कामहरु लकडाउन यता पनि भइरहेको थियो। अब कामलाई तीव्रता दिन सडक डिभिजन कार्यालयले आवश्यक सहजीकरण गरेको कालिला कन्स्ट्रक्सनका इन्जिनियर सुवास पौडेलले बताए। 'आवश्यक निर्माण सामग्री ल्याउन स्थानीय तहसँग समन्वय भइरहेको छ,' उनले भने, ' फिल्डमा चाहिने कुरा व्यवस्थापन गरेर २/३ दिनमै तीव्र गतिमा काम अघि बढ्छ।'
विगतमा सडकको काम सडक विभागले गर्ने र खानेपानीको काम काठमाडौं उपत्यका खानेपानी लिमिटेड (केयुकेएल)ले छुट्टाछुट्टै गर्दा निक्कै समस्या हुँदै आएको थियो। कालिका-वेदांशी जेभीले दुवै निकायसँगको समन्वयमा काम भइरहेको इन्जिनियर पौडेलको भनाइ छ। चैतसम्ममा पाइपको काम सकिने र त्यसको दुई महिनामा पिच गरिसक्ने गरी काम अघि बढाइएको भएपनि लकडाउनले त्यसलाई प्रभावित पारेको पौडेलले बताए।
तथापि धोवीखोला-चाबहिल क्षेत्रमा भने ओभरलेका लागि तयार रहेको र बाँकी सडकमा समेत छिट्टै पिचको काम अघि बढ्ने उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
