काठमाडौं- अहिले जापानमा रहेका स्पेनिस फुटबलर आन्द्रेस इनिएस्टाले कोरोना भाइरस (कोभिड १९) का कारण अहिले खाली बस्नुपरेको समयले आफूले फुटबल मैदानमा बिताउने समय बढ्ने विश्वासमा रहेका छन्।
स्पेनिस क्लब बार्सिलोनाबाट इनिएस्टा २०१८ मा जापानको जे लिग क्लब भिसेल कोबेमा गएका थिए। २०२१ सम्म भिसेल कोबेसँगको सम्झौतामा रहेका उनी त्यसपछिको केही समय पनि फुटबलमा नै रहने देखिएको हो।
स्वास्थ्य र तन्दुरुस्ती नै खेलाडीको लागि प्रमुख विषय भएको भन्दै इनिएस्टाले अझै केही समय आफू फुटबलमा नै रहने संकेत गरेका हुन्। स्पेनिस पत्रिका मार्कासँगको कुराकानीमा उनले अहिले जापानमा अवस्था नियन्त्रणमा नै देखिए पनि स्पेनमा बढ्दै गएको नाजुक अवस्थाले आफूलाई चिन्तित बनाएको पनि बताएका छन्।
अहिले जापानमा नै रहेका उनी त्यहाँको अवस्था सुधारोन्मुख रहेको बताउँछन्। ‘यहाँ अवस्था नियन्त्रणमा नै देखिन्छ। मानिसहरु सम्हालिएर बाहिरफेर निस्किरहेकै छन्। सुरुवाती चरणमा नै विद्यालय बन्द गर्ने र धेरै जमघट हुने कामहरु रोक्न सकेका कारण अवस्था बिग्रन नपाएको हो’ उनले भनेका छन्।
‘खेलाडीहरुको फिटनेस र अभ्यास पनि यहाँ व्यक्तिगत रुपमा तालिका बनाएर घरमा नै भइरहेको छ। प्रशिक्षकसँग भिडियोमार्फत कुराकानी गरेर पनि केही राम्रा अभ्यासहरु भइरहेको हुन्छ’ स्पेनिस पत्रिका मार्कासँग उनले भनेका छन्।
स्पेनमा कोरोना भाइरस (कोभिड १९) का कारण बढ्दै गएको नाजुक अवस्थाले अझै कस्तो समस्याहरु आउने हो भन्नेमा आफू चिन्तित रहेको पनि उनले बताएका छन्।
‘बाहिर बसेर हेर्दा पनि स्पेनको अवस्था असाध्यै डरलाग्दो छ। आश गरौँ अवस्थामा छिटो सुधार हुनेछ। म यहाँ बसेर गर्न सक्ने भनेको नै साथ र सहयोगको सन्देशहरु पठाउने नै हो। यस्तो अवस्थासँग जुध्नका लागि मेरो सधैँ साथ रहने नै छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768981471.jpg)
-1764146706.png)
