काठमाडौं- स्वास्थ्य तथा जनसंख्या मन्त्रालयले कोरोना भाइरस (कोभिड १९) को संक्रमण रोकथाम नियन्त्रण र उपचारका लागि सुदूरपश्चिम र प्रदेश २ मा रेजिडेन्ट चिकित्सक खटाउने भएको छ।
मन्त्रालयले चिकित्सा स्वास्थ्य विज्ञान प्रतिष्ठान (न्याम्स) मा दोस्रो र तेस्रो वर्षमा अध्ययनरत ३४ र धरानस्थित बिपी कोइराला स्वास्थ्य विज्ञान प्रतिष्ठानका २७ जना चिकित्सक प्रदेश २ मा पठाउन लागेको हो।
कोभिड १९ को संक्रमणको जोखिम अन्यत्रभन्दा दुई प्रदेशमा उच्च मानिएको छ। हालसम्म देखिएका १६ संक्रमितमध्ये सुदुरपश्चिम प्रदेशको सेती प्रादेशिक अस्पतालमा पाँच र प्रदेश २ को नारायणी प्रादेशिक अस्पतालमा ४ जना कोभिड १९ का बिरामी उपकचाररत छन्।
काठमाडाको टेकु अस्पतालमा २ जना र बाग्लुङको धौलागिरी प्रादेशिक अस्पतालमा २ जना कोभिड १९ का बिरामी उपचाररत छन्। एक जना निको भइसकेका छन्।
स्वास्थ्य मन्त्रालयका प्रशासन महाशाखा प्रमुख रघुराम बिष्टले शुक्रबार दिउँसो १ बजे चार्टर गरिएको यती एयरको विमानबाट सुदुरपश्चिम प्रदेश लैजाने व्यवस्था गरिएको बताए।
सहसचिव विष्टले भने, ‘उहाँहरुलाई प्रदेशमा पठाउँदै छौं। कोभिड १९ रोकथाम नियन्त्रण र उपचारका लागि जान लागेकोले त्यहाँको प्रदेश र सामाजिक विकास मन्त्रालयले आवश्यकताका आधारमा खटाउनेछ।’
चिकित्सकको स्थानीय तहमा व्यवस्थापन तथा समन्वय प्रदेश सरकारले गर्ने समेत स्वास्थ्य मन्त्रालयले जनाएको छ।
न्याम्समा दोस्रो र तेस्रो वर्षमा अध्ययनरत एमडी चिकित्सकहरुले कोरोना विरुद्धको अभियानका लागि त्यस प्रदेशमा एक महिनासम्म रहेर काम गर्ने बताइएको छ। इन्टरनल मेडिसिन, एनेस्थेसिया र पेडिट्रिसियनलाई मन्त्रालयले प्रदेश पठाउन लागेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
