काठमाडौं- बुधबार साँझ महाराजगंजमा डाक्टरलाई कुटपिट भएपछि महानगरीय प्रहरी वृत महाराजगंजका प्रमुख डिएसपी उमेश लम्साललाई महानगरीय प्रहरी आयुक्तको कार्यालय, रानीपोखरी (मेट्रो) झिकाइएको छ।
बुधबार साँझ ड्युटी सकेर घर फर्केने क्रममा त्रिवि शिक्षण अस्पताल र कान्ति बाल अस्पतालका डाक्टरहरु शम्भू खनाल, तेजप्रकाश साह र विकास साहलाई लकडाउन उल्लंघन गरेको भन्दै डिएसपी लम्सालसहितको प्रहरी टोलीले कुटपिट गरेको थियो। सोही विषयमा थप अनुसन्धान गर्न भन्दै डिएसपी लम्साललाई मेट्रो तानिएको हो।
‘उक्त घटनामा संलग्न रहेका महानगरीय प्रहरी वृत महाराजगंजका प्रमुख प्र.ना.उ. उमेश लम्साललाई प्रमुखको जिम्मेवारीबाट हटाई यस कार्यालय झिकाइएको साथै उक्त घटनामा संलग्न अन्य प्रहरी कर्मचारीलाई यस कार्यालयमा झिकाई आवश्यक छानबिन कार्य भइरहेको व्यहोरा समेत जानकारी गराइन्छ’, महानगरीय प्रहरी प्रवक्ता प्रहरी वरिष्ठ उपरिक्षक श्यामलाल ज्ञवालीद्वारा जारी विज्ञप्तिमा भनिएको छ।
नेपाल लाइभले उक्त समाचार प्रकाशन गरेपछि मेट्रोले उक्त घटनाको छानबिन गर्न भन्दै एसएसपी किरण बज्राचार्य, एसपी मुकेश सिंह र डिएसपी होबिन्द्र बोगटीको नेतृत्वमा समिति समेत बनेको छ।
उक्त समितिले थप अनुसन्धान गरेपछि विभागीय कारबाहीसम्म हुने मेट्रोका डिआइजी विश्वराज पोखरेलले नेपाल लाइभलाई जानकारी दिए।
प्रहरीले लिखित माफी माग्ने, दोषीलाई विभागीय कारबाही
डाक्टरमाथि भएको कुटपिटप्रति प्रहरीले लिखित रुपमै माफी माग्ने भएको छ। साथै, सम्बन्धित प्रहरीमाथि विभागीय कारबाही पनि हुने भएको छ।
स्वास्थ्य मन्त्रालयमा भएको वार्तामा लिखित माफी र विभागीय कारबाहीमा सहमति जुटेको हो।
दोषीलाई कारबाही गर्नुपर्ने माग डाक्टरहरु उठाउँदै आएका थिए।
यसअघि त्रिवि शिक्षण अस्पतालमा बिहीबार बिहान भएको छलफलमा प्रहरीले गल्ती भएको भन्दै मौखिक रुपमा माफी मागेका थिए। प्रहरीले लिखित रुपमा माफी माग्नुपर्ने र गल्ती गर्नेलाई विभागीय कारबाही गर्नुपर्ने आवासीय चिकित्सकको माग राखेपछि छलफल टुंगिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763690829.png)
-1763559424.jpg)
