काठमाडौं- दक्षिण अफ्रिकाका क्रिकेटर एबी डी भिलियर्सले टी ट्वान्टी विश्वकप खेल्न आफू तयार रहेको बताए पनि कोरोना भाइरस (कोभिड १९) का कारण प्रतियोगिता सरेमा उनको उपस्थितिको सम्भावना कमजोर हुनेछ। अस्ट्रेलियामा आउँदो अक्टोवर १८ देखि नोभेम्बर १५ सम्म हुने तय रहेको प्रतियोगितालाई अहिलेको परिस्थितिले असर गर्ने डर बढेको छ।
३६ वर्षका डी भिलियर्सले २०१७ को अक्टोवर २९ मा बंगलादेशविरुद्ध खेलेपछि टी ट्वान्टी अन्तर्राष्ट्रिय खेल खेलेका छैनन्। टी ट्वान्टी खेलकै कुरा गर्दा भने उनी यसै सिजनको बिग ब्यास लिगसम्म खेलिरहेका थिए।
दक्षिण अफ्रिकाको एक साप्ताहिक पत्रिका ‘रापोर्ट’ लाई उद्धृत गर्दै इएसपिएन क्रिकइन्फोले लेखेको छ- ‘खेलाडीका लागि खेलको लयसँगै फिटनेसका कुराले पनि ठूलो अर्थ राख्नेछ, गएको वर्ष एकदिवसीय विश्वकपमा आउन चाहँदाको जस्तो असफलतालाई पनि उनले विचार गरेका छन्।’
२०१८ को मे महिनामा अन्तर्राष्ट्रिय खेलबाट सन्यास लिएर बसिरहेका डी भिलियर्सले गएको वर्ष एकदिवसीय विश्वकपमा खेल्ने चाहना अन्तिम समयमा देखाउँदा उनलाई दक्षिण अफ्रिकी टिम ब्यवस्थापनले अनुमति दिएको थिएन। अन्तिममा समयमा उनलाई खेलाउँदा लामो समयदेखि अभ्यासमा सँगै रहेका खेलाडीलाई न्याय नहुने ब्यवस्थापनले बताएको थियो।
अहिले गएको डिसेम्बरदेखि मार्क बोचरले दक्षिण अफ्रिकी टिमलाई प्रशिक्षण दिन थालेदेखि डी भिलियर्स टिमको टी ट्वान्टी विश्वकप योजनासँग जोडिएका छन्। बिग ब्यास खेलिरहेकै बेला पत्रकारहरुसँग डी भिलियर्सले भनेका थिए- ‘दक्षिण अफ्रिकाका लागि फेरि मैदान फर्कन पाए मलाई खुसी लाग्नेछ। आश गरौँ त्यो छिटै हुनेछ पनि।’
तर गएको फेब्रुअरीमा दक्षिण अफ्रिकाले इंग्ल्याण्ड र अस्ट्रेलियासँग खेल्ने टी ट्वान्टी टिममा डी भिलियर्सको नाम समावेश भएन। डी भिलियर्सले इन्डियन प्रिमियर लिग (आइपिएल) खेलेपछि उनी टिममा फर्कन सक्ने संकेत भने मिलेको थियो। दक्षिण अफ्रिकाले जुनमा श्रीलंकासँग र जुलाई र अगस्टमा वेस्ट इन्डिजसँग पाँच टी ट्वान्टी खेल खेल्ने तालिका पनि तय छ।
तर ती सबै खेलसँगै आइपिएल र टी ट्वान्टी विश्वकप पनि कोरोना भाइरस (कोभिड १९) का कारण अहिले अन्योलमा छ। यस्तोमा बढ्दो उमेर र खेल लयमा आइरहेको चिन्ताका कारण डी भिलयर्सको विश्वकपमा देशका लागि खेलमा फर्कने चाहना पनि अन्योलमा नै परेको छ।
‘यदि विश्वकप एक वर्ष पछि धकेलियो भने धेरै कुराहरु फेरिने छ। अहिलेको अवस्थामा म खेल्न सक्नेछु भन्ने लागिरहेको छ तर खेल हुने समयसम्म शरीरले के संकेत गर्नेछ त्यो थाहा छैन। यदि म शतप्रतिशत तयार रहेँ भने पक्कै पनि उपलब्ध हुनेछु’ डी भिलियर्सले भनेका छन्।
अहिले कमब्याकको लागि डी भिलियर्स स्पष्ट नहुनुमा कारण फिटनेस मात्र पक्कै पनि होइन। यदि यहि वर्ष नै टी ट्वान्टी विश्वकप भयो भने पनि डी भिलियर्स चाहँदैनन् कि २०१९ को एकदिवसीय विश्वकप खेल्ने चाहना देखाउँदाको जस्तो खराब समय आओस्। गएको वर्ष उनले आफूले चाहेको बेलामा टिममा पर्न सक्छु भन्ने सोचेको भन्दै यही कारण डी भिलियर्सकै समेत आलोचना भएको थियो।
डी भिलियर्स आफूले फरक सुविधा कहिले पनि नखोजेको बताउँछन्। आफूले आफ्नो चाहना व्यक्त गरेको र आवश्यक पर्दा खेल्न सक्ने जनाएको उनको भनाइ छ। ‘अरु हरेक खेलाडीले जस्तै टिममा आफ्नो स्थान बनाउन मैले पनि मेहनत गर्नैपर्छ, म टिममा योग्य छु भन्ने भएँ भने मात्र टिममा पर्ने हो। गएको वर्ष मैले आफ्नो लागि नभएको ठाउँ मागेको जस्तो आलोचना हुँदा मलाई निकै चित्त दुःखेको थियो’ उनले भने।
अहिलेसम्म ७८ टी ट्वान्टी अन्तर्राष्ट्रिय खेल खेलेका डी भिलयर्सले १३५.१६ को स्ट्राइक रेटमा १ हजार ६ सय ७२ रन बनाएका छन्।
दक्षिण अफ्रिकामा कोरोना भाइरस (कोभिड १९) का कारण ३५ दिनको लकडाउन घोषणा गरिएको छ। अहिले त्यसको १९ दिन बितिसक्यो। घरबाहिर निस्कन पूर्ण बन्देज लगाएको अवस्थामा खेलाडीहरु घरमा नै मिल्दो व्यायाम गरेर बसिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752206955.png)
-1752043710.jpg)
-1749826086.png)
