काठमाडौं- इंग्लिस प्रिमियर लिग क्लब टोटनह्यामले खेलाडीबाहेकका केही कर्मचारी निकाल्न यसअघि गरेको निर्णयबाट पछि हटेको छ। केही कर्मचारीलाई निश्चित समयको बिदा दिएर घर पठाउन गरेको निर्णय समर्थकहरुको आलोचनापछि फिर्ता लिएको हो।
यसअघि गएको हप्ता प्रिमियर लिगकै शीर्ष स्थानमा रहेको क्लब लिभरपुलले पनि यस्तै निर्णय गरेर फिर्ता लिएको थियो।
खेलाडीबाहेकका केही कर्मचारी निकाल्ने निर्णय गर्दा जागिरबाट बिदा पाउने ती कर्मचारीले क्लबमार्फत केही नपाए पनि सरकारको रोजगारी सुरक्षा योजना अन्तर्गत ८० प्रतिशत तलब पाउन सक्ने सुविधा रहेको थियो। कोरोना भाइरस (कोभिड १९) का कारण युरोपभर नै आर्थिक संकटमा क्लबहरु परिरहँदा यस्ता निर्णयहरु भइरहेका हुन्।
यसका साथै टोटनह्यामले गएको मार्च ३१ मा खेलाडीबाहेकका कर्मचारीको तलब २० प्रतिशत घटाउने निर्णय गरेको थियो। अहिले उक्त निर्णयलाई पनि सच्याउँदै कर्मचारीहरुले अप्रिल र मे महिनाको तलब शतप्रतिशत नै पाउने जनाएको छ। यसका साथै बोर्ड सदस्यहरुले मात्रै आफ्नो तलब कम गरेर लिने पनि उल्लेख छ।
युरोपभर नै कोरोना भाइरसका कारण अप्ठ्यारो परिस्थिति सिर्जना भइरहे पनि खेलाडीबाहेकका कर्मचारीको तलब कम गर्ने निर्णय इंग्ल्याण्डमा मात्र देखिएको हो। केही देशले खेलाडीको नै तलब कम गरिरहेका छन् भने केहीले ढिला तलब दिने गरी सहमति गरेका छन्।
स्पेनिस क्लब बार्सिलोना र एथ्लेटिको मड्रिडका खेलाडीहरु ७० प्रतिशत तलब कम गर्न राजी भएका छन्। इटालियन क्लब युभेन्टसका खेलाडीले चार महिनासम्म तलब रोक्न सहमति जनाएका छन्। अरु क्लबमा पनि खेलाडीहरु कम तलब लिन मानिरहेका देखिन्छन्।
कोरोना संक्रमणकै कारण युरोकप फुटबल सरेको छ, च्याम्पियन्स लिग, युरोपा लिगसँगै क्लब विश्वकप जस्ता ठूला प्रतियोगिताहरु सरेका छन्। खेल गतिविधि बन्द हुँदा क्लबको आयको माध्यम पनि कमजोर भएको छ। फुटबल जगतमा कल्पना गरिएभन्दा खराब स्थिति देखिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773072269.png)
-1773054140.png)
-1773053162.png)
-1764146706.png)
-1772777462.png)
