काठमाडौं- फुटबलर क्रिष्टियानो रोनाल्डोले कोरोना भाइरस (कोभिड १९) विरुद्ध लड्न सबै एकजुट भएर अघि बढ्न आग्रह गरेका छन्। इटालियन क्लब युभेन्टसमा रहेका पोर्चुगल स्टार रोनाल्डोले राष्ट्रिय झण्डा अंकित मास्क लगाएको फोटो राख्दै सामाजिक सञ्जालमार्फत त्यस्तो सन्देश दिएका हुन्।
‘विश्वकै लागि यो निकै कठीन परिस्थिति हो, यस्तोमा हामी सबै एक भएर एकअर्कासँगै अघि बढ्नु आवश्यक छ। हामीले आफ्नो ठाउँबाट जे सहयोग गर्न सक्छौँ त्यो गरौँ’ उनले लेखेका छन्।
कोरोना भाइरसको संक्रमण देखिन थालेपछि रोनाल्डो इटालीबाट आफ्नो घर पोर्चुगल फर्किएका थिए। जहाँ उनी सेल्फ क्वारेन्टाइनमा नै छन्।
इटालीमा बढ्दै गएको कोरोना भाइरसको संक्रमणमा युभेन्टसका खेलाडीहरुमा पनि कोरोना भाइरस (कोभिड १९) देखिएको थियो। रोनाल्डोमा भने भाइरस नेगेटिभ देखिएको थियो।
रोनाल्डोसँगै अन्य फुटबलरहरुले पनि सामाजिक सञ्जालमार्फत एकताको सन्देश दिइरहेका छन्। विश्व एक भएर लाग्नुपर्ने उनीहरुको धारणा छ।
कोरोनाकै कारण ठप्प फुटबल गतिविधिका कारण क्लबहरुमा परेको आर्थिक संकटमा पनि खेलाडीहरुले सहयोग गरिरहेका छन्। युभेन्टसका खेलाडीहरुले चार महिना ढिला तलब लिने गरी सहमति गरेका छन्। अरु युरोपियन क्लबहरुमा खेलाडीको तलब कम गर्ने सहमतिहरु भइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
