काठमाडौं- गएको सिजनदेखि नै नयाँ स्ट्राइकर ल्याउने योजनामा लागेको स्पेनिस क्लब बार्सिलोनाले इटालियन क्लब इन्टर मिलानका लाउटारो मार्टिनेजलाई भित्र्याउन एक कदम अघि बढेको स्पेनिस सञ्चार माध्यमले जनाएका छन्।
लुइस स्वारेजको ढल्किँदो उमेरका कारण नयाँ भविष्यसम्मका लागि नयाँ खेलाडीको खोज आवश्यक रहेको बार्सिलोनाको बुझाइ छ।
स्वारेजको स्थानमा ल्याइने खेलाडी उही स्तरको हुनुपर्ने भन्दै केही खेलाडीको खोजमा लागेको बार्सिलोनाले मुख्य केन्द्रमा मार्टिनेजलाई राखेको हो। अर्जेन्टिनाका मार्टिनेजको मेस्सीसँगको तालमेल राम्रो भएकाले पनि त्यसले सहज हुने विश्वास गरिएको छ।
तर मार्टिनेजका लागि बार्सिलोना मात्रै होइन स्पेनिस क्लब रियल मड्रिड, इंग्लिस क्लब म्यानचेस्टर सिटी पनि लागिपरेको बताइन्छ। त्यसका साथै मार्टिनेजलाई क्लबमा नै राखिराख्न इन्टर मिलानले पनि कुनै कसर बाँकी राख्ने छैन।
इन्टर मिलानसँग मार्टिनेजको सम्झौता २०२३ को जुनसम्मका लागि रहेको छ। त्यसैले नयाँ सम्झौताका लागि इन्टरले कुराकानी गरिरहेको बताइन्छ। तर युरोपका अरु क्लबबाट आइरहेको चासोका कारण मार्टिनेज पर्ख र हेरको स्थितिमा नै देखिन्छन्। बार्सिलोना पनि मार्टिनेज आफ्नो क्लबमा आउने विश्वासका साथ कुराकानी अघि बढाएको छ।
अर्जेन्टिनाको क्लब लिनियर्स हुँदै रेसिङ क्लबको युवा टिम र रेसिङकै सिनियर टिम हुँदै मार्टिनेज २०१८ मा इन्टर मिलान गएका थिए। २२ वर्षका मार्टिनेजले अर्जेन्टिनाको राष्ट्रिय टिमबाट समेत २०१८ देखि खेलिरहेका छन्।
कोरोना भाइरस (कोभिड १९) का कारण अहिले विश्व फुटबल गतिविधि ठप्प छ। क्लबहरुमा देखिएको आर्थिक संकटका कारण खेलाडीहरुको तलब कम गरिएका छन्। बार्सिलोनामा अहिले खेलाडीहरु ७० प्रतिशत तलब कम गर्न राजी छन्। क्लबको यो संकटले आउँदो सिजनमा ठूला ट्रान्सफरमा असर पर्ने आँकलन पनि भइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
