काठमाडौं- सोमबार बसेको मन्त्रिपरिषद बैठकले लगानी बोर्डका प्रमुख कार्यकारी अधिकृत (सिइओ) महाप्रसाद अधिकारीलाई नेपाल राष्ट्र बैंकको गभर्नरका रुपमा नियुक्त गरेपछि उक्त पद खाली हुने भएको छ। यद्यपि अधिकारीले सिइओ पदबाट राजीनामा भने दिइसकेका छैनन्।
अधिकारी २०७३ असार ९ गते ४ वर्षका लगानी बोर्डको सिइओ नियुक्त भएका थिए। लगानी बोर्ड ऐन २०६८ अनुसार कार्यकारी प्रमुखको नियुक्तिका लागि लगानी बोर्डको संचालक समितिको उपाध्यक्ष समेत रहने अर्थमन्त्रीको संयोजकत्वमा राष्ट्रिय योजना आयोगको उपाध्यक्ष र नेपाल सरकारको एकजना पूर्व सचिव सदस्य रहेको एक छनौट समिति बनाउनुपर्ने व्यवस्था छ।
तत्कालीन अर्थमन्त्री तथा बोर्डका उपाध्यक्ष विष्णु पौडेलले राष्ट्र बैंकका पूर्व डेपुटी गभर्नरबाट अवकाश पाएका अधिकारीलाई सिइओमा नियुक्त गरेका थिए। त्यो बेला राष्ट्रिय योजना आयोगको उपाध्यक्षका रुपमा डा युवराज खतिवडा थिए।
लगानी बोर्ड ऐनअनुसार सिइओ नियुक्त भएको ४ वर्ष र सरकारले चाहेको खण्डमा थप १ वर्ष कार्यकाल थप्न सकिने व्यवस्था छ। तर अधिकारीलाई भने पहिलो ४ वर्षे कार्यकाल सकिन ३ महिना बाँकी छँदै सरकारले गभर्नरजस्तो महत्वपूर्ण जिम्मेवारी सुम्पेको छ। उनले गभर्नर नियुक्ति पाएसँगै बोर्डको सिइओ पद खाली भएको हो।
लगानीसम्बन्धी नीति तर्जुमा गर्ने वा गराउने,
सरकारले तय गरेका लगानीका क्षेत्रमध्ये प्रतिस्पर्धात्मक वा प्राथमिकताका क्षेत्रको छनौट गर्ने गराउने, लगानी योग्य परियोजनाको छनौट गरी प्रस्ताव आह्वान, प्राप्त प्रस्तावको मूल्याङ्कन, लगानीकर्तासँग वार्ता, लगानीको स्वीकृति प्रदान, प्रस्तावकसँग तोकिएबमोजिम सम्झौता गर्ने, भएको सम्झौताबमोजिम परियोजना निर्माण, कार्यान्वयन वा सञ्चालन भए वा नभएको अनुगमन गर्ने र लगानी प्रवर्द्धनका लागि विभिन्न मन्त्रालय, सरकारी तथा स्थानीय निकायबीच समन्वय गर्ने वा गराउनेजस्ता महत्वपूर्ण जिम्मेवारी लगानी बोर्डले निभाउँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
