नयाँ दिल्ली- दिल्लीको धार्मिक सभामा सहभागी भएका मानिसमा तीन दिनमा कोरोना भाइरस संक्रमितको संख्या ६ सय ४७ पुगेको छ। बिबिसी हिन्दीका अनुसार कुल संक्रमितमध्ये ६ सयभन्दा धेरै दिल्लीको सभामा सहभागी मानिसमा कोरोना भाइरस संक्रमण भएको पाइएको हो।
भारतमा २५ सय ६७ जनामा कोरोना भाइरसको संक्रमण पुष्टि भएको छ भने ७२ जनाले ज्यान गुमाइसकेका छन्। इन्डियन काउन्सिल अफ मेडिकल रिसर्चका अनुसार पछिल्लो २४ घन्टामा भारतमा आठ हजार नमुना परीक्षण गरिएको छ। भारतमा १ सय ८२ वटा ल्याबले कोरोना परीक्षणको काम गरिरहेको छ। त्यसमध्ये १३० सरकारी ल्याब रहेका छन्। दिल्लीको धार्मिक सभा तबलिगी जमानसँग जोडिएका मानिसको १९ राज्यमा परीक्षण भइरहेको छ। पछिल्ल्लो २४ घन्टामा भारतमा १२ जनाले कोरोना भाइरसका कारण ज्यान गुमाएका छन्।
कोरोना सक्रमण रोक्न सरकारको योजनामा मरकजका कारण धक्का : राष्ट्रपति कोविन्द
पछिल्लो समय केन्द्र र राज्य सरकारले कोरोना भाइरसको रोकथामका लागि गरेको कार्यमा दिल्लीको धार्मिक सभाले ठूलो धक्का लागेको राष्ट्रपति रामनाथ कोविन्दले बताएका छन्। उनले कोरोना भाइरसको संक्रमण रोक्न सरकारले गरेको लकडाउनलाई पालना गर्न सबैलाई आग्रह गरेका छन्।
लकडाउनको समयमा कसैले भोकै रहन नपरोस् त्यसका लागि सरकारले काम गरिरहेको उनले बताए। राष्ट्रपति कोविन्दले उपचारमा खटिएका नर्स र डाक्टरमाथि भएको आक्रमणको निन्दा समेत गरे। उनले दिल्लीमा भएको निजामुद्दिन मरकजको सम्मेलनले सरकारको कोशिसलाई एक पटक पुनः धक्का लागेको बताए।
भारतीय सञ्चार माध्यमका अनुसार अधिकतम २५ सय मानिससम्म जम्मा भएको आँकलन गरिएको उक्त सभामा सहभागी भएका मानिसहरुमा भटाभट कोरोना भाइरस पोजेटिभ देखिन थालेपछि भारतसहित छिमेकी देशहरुमा पनि त्रास सिर्जना भएको छ। उक्त सभामा विश्वभरबाट ४० हजार मानिस उपस्थित हुने गरेका थिए। तर पछिल्लो समय उक्त सभामा १७ सय मानिस भेला भएको दिल्ली प्रहरीले पाएको थियो। उक्त सभामा नेपालका १९, मलेसियाका २०, अफगानिस्तानका एक, म्यानमारका ३३, किर्गिस्तानका २८, इन्डोनेसियाका ७२, थाइल्याण्डका ७, श्रीलंकाका ३४, बंगलादेशका १९ र अन्य देशका नागरिक सहभागी भएको खुलेको छ।
दिल्लीमा भएको उक्त सभामा सहभागी भएकामध्ये ६ जनाले कोरोना भाइरसका कारण ज्यान गुमाएका छन् भने भारतमा मात्र ९३ जनामा कोरोना पोजेटिभ रिर्पोट आएको छ। करीब ७ सय जना क्वारेनटाइनमा रहेका छन्। उक्त धार्मिक सभामा सहभागी भएर आ-आफ्नो देश फर्केका मानिसबाट पनि कोरोना सर्ने सम्भावना देखिएपछि एसियामा कोरोना भाइरस सार्ने केन्द्रको रुपमा मस्जिदको यो धार्मिक सभा हुने सम्भावना देखिएको छ । उक्त सभामा नेपालबाट पनि सहभागी भएका थिए। नेपालबाट सहभागी भएका १७ जना नेपाली दिल्लीको क्वारेनटाइनमा छन् भने अन्यको नेपालमा खोजी भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
